Meclîsê Xoserîya Demokratîke ya Şingalî derheqê hêrişê vizêrînî yê dewleta tirke yê vera Nêweşxaneyê Sikênîyê de eşkerayîyêke daye.

Eşkerayîye wina ya:

''Menga tebaxe semedê ma menga şînî bîye. Ma pêro tebaxe de şehîdê Fermanê 2014î yad kerdî. La semedo ke dişmenanê êzidîyan pê nê qirkerdişan qîm nêkerd hêrişanê xo rê dewam kerd. 16ê tebaxe de vera Fermandarê ercîyayeyî û pawitoxê Şingalî Seîd Hesenî û şerwanê YBŞyî Îsa Xwedêdayî hêriş ame kerdene. No hêriş hêrişêko namerd bi. Seke zanîyeno nê wird embazan semedê Şingalî xebatê dîplomatîkî kerdêne ke Xoserîya Şingalî bişinasîya. 16ê tebaxe ra di rojî verî Seîd Hesenî amadekarî kerdêne ke Serekwezîrê Iraqî Mustafa Kazimîyî bivîno. 16ê tebaxe de nê wird embazê ma ameyî şehîdkerdene.

No hêriş verê çimê Kazimîyî de ame kerdene. Kazimî a roje Şingal de bi. La ne hukmatê Iraqî ne zî Kazimî derheqê mesele de eşkerayîye daye. Herinda ke o Tirkîya şermezar bikero serê goranê komkîyan ê Koçoyî de vat ke ê do Tirkîya reyde têkilîyanê xo xurtêr bikerê, Peymana 9ê Teşrîna Verêne bivisnê dewre. Nê vateyanê Kazimîyî ra dima hêrişo barbar ame kerdene.

Hema ke xeyma serweşîye ya Seîd Hesen û Îsa Xwedêdayî erdî ser o bi vizêr dewleta tirke ya îşxalkere hêrişê Nêweşxaneyê Sikênîyê kerd. Hêrişê nê di rojanê peyênan gamêka newîye ya fermanan a. Nê hêrişî normal nîyê. Ma nîyetê dişmenanê êzidîyan hol zanenê.

Hêrişê vera Nêweşxaneyê Sikênîyê sûcê merdimîye yo. Goreyê qanûn û wijdanan  hêrişê vera nêweşxaneyan sûc o, bêexlaqî û bêwijdanîye yo. Seke eşkerayîya YBŞyî de zî ame îfadekerdene no nêweşxane binê xizmetê komelê êzidîyan û ereban de bi. Dadî, doman, kêna û ciwanê Şingalî nê nêweşxaneyî de ameyêne dermankerdene. La dewleta tirke ya îşxalkere verê çimanê dinya de nêweşxane da bombayan ver. 4 reyî  nêweşxane dîya bombayan ver. Hêrişê verênî ra dima şarî waşt ke xo biresno birîndaran la reyna nêweşxane dîya bombayan ver. Şarî wina şehîd û birîndarê xo binê xirbeyan ra vetî.

Nê hêrişî xîretê fermanan ê neweyan o. Peymana 9ê Teşrîna Verêne ya PDK, hukmatê Iraqî û Tirkîya nê hêrişan rê bîya zemîn.  Şarê ma destpêkî ra nata na peymane qebul nêkerdbî. Înan heta nika xîret kerd ke pê tedayanê sîyasîyan, ablûqayan û gefan peymane bivisnê dewre la nêeşkayî îradeyê ma teslîm bigêrê. Serrgêra Fermanê 3ê Tebaxe de Serekê PDKyî Mesûd Barzanîyî bi wesîleya serrgêre  mesajêk vila kerdbi û pê gefan vatbi 'Wa Şingal sey nika nêmano.' Xora çend wextî yo ke PDK pê eşkerayîyanê xo Şingal keno hedefê Tirkîya. Heman roje selahîyetdaranê Amerîka yê Iraqî, Sefîrê Tirkîya yê Bexdadî, Temsîlkarîya Neteweyan ê Yewbîyayeyan û Serekwezîrê Iraqî Kazimîyî Peymana 9ê Teşrîna Peyêne viste rojdem. Aya ke raşta raşt hêriş kena dewleta tirke ya la nê hêrişan çarçewa plansazîyêka herêmî û mîyanneteweyî de kena.

Seke ma verî zî vat çend bedelan bidê zî ma do rayîr nêdê Komployê 9ê Teşrîna Verêne. Vateyê ma yo peyên no yo. Heta ke hukmatê Iraqî vera hêrişanê dewleta tirke çîyêk nêvajo o zî hemkarê ci yo. Xora key qala Peymana 9ê Teşrîna Peyêne amebî kerdene dewleta tirke hêrişê Şingalî kerd. Tewr peyên vateyanê Kazimîyî ra dima zî wina bi. La belkêş o hukmatê Iraqî hêrişî ser o eşkerayîyêke nêdaye. Nê komployî de rolê hukmatê Kazimîyî çita yo? Dewleta tirke senî hasmênê Iraqî şuxilnena?Na bêvengîye eşkera kena ke bara înan zî nê hêrişan de esta. Eşkera yo Iraq, PDK, dewleta tirke binê çimdarîya NYyî de wazenê pê nê hêrişan Peymana 9ê Teşrîna Verêne bivisnê dewrê. Ma wazenê bi taybetî Temsîlkarîya NYyî ra pers bikerê ke senî verê çiman de Tirkîya eşkena hêrişê nêweşxaneyî bikera? Goreyê peymanan no sûcê merdimîye yo. Temsîlkarîya şima her roje Şingal de peymane ser o peymane dana la çira na babete de çîyêk nêvana?

Mesuldarê nê hêrişê hukmatê Iraqî yo. Çunke Şingal binê serwerîya Iraqî de yo. La nê hêrişan de ame  famkerdene ke Iraq nêeşkeno Şingalî bipawo. Seke dayîyêka êzidîye persa 'Kerametê dewleta Iraqî ça de yo?' Reyna îsbat bi ke êzidîyî nêeşkenê pawitiş û îdareyê xo teslîmê qet yew hêzî bikerê. Caardişê Xoserîya Şingalî ra ber qet yew rayîrê êzidîyan çin o ke ferman û hêrişan ra xo bipawê.

Nê esasî ser o ma verî venga komelê êzidîyan danê ke ma îtîfaqê xo awan bikerê, vera hêrişan bibê yew û verê fermanan bigêrê. Ma venga wijdanê merdimîye danê ke hêrişê vera Şingalî hêrişê vera merdimîye yo.  Ganî çar hetê dinya semedê pawitişê Şingalî têbigêrê. Ma vanê ke ê kamyew komplo û planî zî bikerê zî ma bedelanê giranan zî bidê do Xoserîya Şingalî bîyarê ca, qesasê şehîdan bigêrê. Şehadetê kêna û xortanê êzidîyan îrade û bawerîya ma xurtêr kerdî. Şingal do teslîm nêbo, xo ver bido û azad bo.

Netîceyya nê hêrişanê barbaran de çend embazê ma şehîd û birîndar bîyî. Ma vizêrî ra nata xîret kenê ke nasnameyê înan zelal bikerê. La bombardumanê giranî ra semed xebatê teşhîsî kewtî erey. Netîceya hêrişê vera Nêweşxaneyê Sikênîyê de 8 kesî şehîd bîyî û 4 kesî zî birîndar bîyî. Nê 8 şehîdan ra 4 tenî şerwanê YBŞyî bîyî ke nêweşxane de ameyêne dermankerdene. 3 şehîdî zî xebatkarê weşîye bîyî. Şehîda bi nameyê Muhlîse Sîdar eslê xo de Şirnex ra ya. A wextê Fermanê 2014î de vengdayîşê seferberîye ser o ameye Şingal ke xizmetê weşîye bikera. 4 kesê birîndarî Hesen, Evdî, Semîr û Macîd zî xebatkarê weşîye yê.

Nasnameyê şehîdan wina yê:

Hemîd Sadun (Qîran Sîba), Şerwanê YBŞyî

Xidir Şeref (Pîr Xidir), Şervanê YBŞyî

Ramî El Salim (Ronî), Şerwanê YBŞyî yo ereb

Meytem Xidir Xelef (Serhed Zemar),Şerwanê YBŞyî yo Ereb

Elî Reşo Xidir, Xebatkarê Weşîye

Sedo Îlyas Reşo,Xebatkarê Weşîye

Hecî Xidir,Xebatkarê Weşîye

Muhlise Sîdar, Xebatkara Weşîye”