Dewleta tirke ya îşxalkere vizêrna vera Şingalî têdima hêrşian kena. Şarê êzidîyî vera nê hêrişan hersê xo ard ziwan.

Hêrişê dewleta tirke yê vera Şingalî de vizêr Fermandarê YBŞyî Seîd Hesen û şervanê YBŞyî Îsa Xwedêda şehîd bîyî û hîrê sîvîlî zî birîndar bîyî. Ewro zî dewa Şikênîyê ya Şingalî de nêweşxane hetê dewleta tirke ra ame bombardumankerdene. Nêweşxane rijîya û binê rijîyaşî de şehîd û birîndarî estê. Şarî ke waşt birîndaran bixelisno  raştê hêrişê hewayî yê dewleta tirke ame. Êzidîyan cayê qewimîyayîşî de vera dewleta tirke, hukmatê Iraqî û Serekê PDKyî Mesût Barzanî nêrazîbîyayîş ramojna.

Dayîkêka êzidîye ke ajansê ma rê qisey kerd vat: ''No nêweşxane ke raştê hêrişî ame xizmetê êzidîyan û ereban de bi. Doktorê ke tede yê doman û wayûbirayê ma yê. Nêweşxaneyê sîvîlan o. Nika bi desan sîvîlî binê nê enkaz de yê. Hendê  dewleta tirke hukmatê Iraqî û Mesût Barzanî zî nê qirkerdişî ra berpirsîyar ê. Çîyo ke DAÎŞî kerdêne nika nê kenê û dinya zî vera nê zilmî bêveng a.''

Dayîka bîne zî vera bêvêngîya dinya nêrazîbîyayîş ramojna û vat: ''Ma badê DAÎŞî agêrayî herra xo la nika zî dewleta tirke ma bombarduman kena.  Ma êzidîyan ra çi wazenê? Heme dinya çimê xo girewtî, zilmo ke ma êzidîyan rê beno nêvînena. Vanê huqûq, vanê heqê merdiman la êzidîyî yenê mirênayene. Vengê çewî nêvejîyeno.''