Teyerayanê keşfî yê dewleta tirke ya îşxalkere vizêr saete 12.00 de merkezê Şingalî de rayîrê sûka kahane de wesayîtêkê YBŞyî bombarduman kerdç Fermandarîya YBŞyî pê eşkerayîyêke da zanayene ke  hêriş de Fermandarê YBŞyî Seîd Hesen, birazîyê ci û şerwanê YBŞyî Îsa Xwedêda şehîd bîyî, 3 sivîlê bi nameyê Medya Qasim Simo, Şamir Abbas Berces, Mîrza Alî zî birîndar bîyî.

Cenazayê Fermandar Seîd Hesen û Îsa Xwedêdayî seba otopsî erşawîyayî Mûsil. Cenazayî agêrayîş de serê rayîrê Telaferî de hetê bi seyan kesan ra bi karwanêkî ameyî pêşwazîkerdene.

Cenazayî dima pê konvoyê wesayîtan wedarîyayî keyeyanê Hesen û Xwedêdayî û uca ra zî pê beşdarîya bi hezaran kesan ameyî berdene bi Goristanê Şehîdan ê Şehîd Dilgeş û Şehîd Berxwedanî yê Koyê Şingalî. Goristan de seba şehîdan merasîmêko leşkerî ame kerdene.

Nameyê Fermandarîya YJŞyî ser o Vîyane Hebabî qisey kerd û vat: ''Embaz Seîd û Îsa hetê şarî ra zaf ameyêne heskerdene. Înan seba yewîya êzidîyan xeylêk kede daye. Hînî hukmatê ıraqî ra yew hêvîya ma nêmenda. Eke dewletêka bi nameyê Iraqî estba Tirkîya nêeşkayêne hêrişê ma bikera.''

Nameyê Îdareyê Xoserî yê Şingalî ser o Heso Îbrahîmî qisey kerd û vat: ''Wird embazanê ma zî roja verêne ra nata vera fermanî êzidîyî pawitêne.''

Qiseykerdişan ra dima cenazayî bi sloganê 'Şehîdî nêmirenî' ameyî definkerdene û merasîm qedîya.