YBŞyî da pêhesnayene ke hêrişê dewleta tirke yê vera Şingalî de Fermandarê înan Seid Hesen û birarzayê ci şerwan Îsa Xwededa şehîd bîyî û 3 sîvîlî zî birîndar bîyî. YBŞyî vat do gonîya şehîdan erdî de memano.
Fermandarîya Yewîyanê Xoverdayîşê Şingalî (YBŞ) derheqê hêrişê vera Şingalî de eşkerayîye daye û nê pare kerdî:
''Ewro serê rayîrê sûka kahane ya Şingalî de yew wesayîtê me raştê hêrişê teyarayanê keşîfî yê dewleta tirke ameyî. Hêrişî de Fermandarê YBŞyî Seid Hesen û birarzayê ci şerwanê YBŞyî Îsa Xweeda şehîd bîyî û 3 sîvîlê bi nameyê Medya Qasim Simo, Şamîr Abas Berces û Mirza Alî birîndar bîyî.
No hêrişo verên nîyo ke vera êzidîyan beno. Dewleta tirke pê hêrişanê îşxalî wazena êzidîyan qir bikero. No hêriş vera xopawitiş û heqê xo pawitişî yê êzidîyan ame kerdene.
Dewleta tirke ya îşxalkera ke hîrê serrî verê cu Mam Zekî hedef girewt, ewro zî embazê ma Seid hedef girewt. Embaz Seid bi serran rêxistinbîyayîşê êzidîyan rê serkêşîye kerde. Semedê xopawitişê êzidîyan fermandarîye kerde. Fermanî ra nata tim sefanê verînan de cayê xo girewt û rolê xo kay kerd. Seba ke dejê êzidîyan warê sîyasetî de ramojno bi ziwanê êzidîyan. Semedê xo pawitişî hêz û bawerî da şarê xo.
Gonîya fermandarê ma yê pîlî embaz Seidî do erdî de nêmano. Ma do heta binfînayîşê dewleta tirke ya faşîste têkoşînî rê dewam bikerê. Bi hezaran şerwanê embaz Seidî do rolê xo yê fedayî bîyarê ca.
Ma veng danê heme şarê êzîdî, şarê kurd û merdimîya birumete ke vera hêrişanê faşîstan vejîya wayîrê şahîdan vejîyê.
Ma soz danê Şehîd Seid, Şehîd Mam Zekî û Şehîd Îsayî ke ma do Şingalê azad û demokratîkî awan bikerê û şarê xo bipawê. Ma do rêçê şehîdan de ser bikewê.''
