Heyetê Îdareyî yê Federasyonê Komeleyanê Demokratîkan ê Kurdîstanijan ê Vakurê Almanya (FED-DEM) û Federasyonê Komeleyanê Demokratîkan ê Kurdîstanijan ê Rojhelatê Almanya (FED-KURD) sereştişê polîsanê almanan ê vera Komeleya Kurdan a Bremenî  û destbendkerdişê kurdan ê welatperweran şermezar kerd.

Eşkerayîya FED-DEMî de ca dîya nînan: ''Polîsanê almanan roja pancşemeyî saetanê serê sibayî de eşt Merkezê Komelê Demokratîkî yê Kurdan ê Bremenî ser. Ma serşetişê vera komeleya Bremenî ya ke  şarê kurdî yo welatperwer, roşnvîrê demokratî tede yenê têhet, şermezar kenê. Komeleya kurdan a Bremenî goreyê qanûnî ameye ronayene û teberê qanûnî de çîyêk nêkena. La çi heyf ke polîsanê almanan serrêke de di reyî eşt komele ser û komeleya ka krîmînalîze kenê. Komeleya Bremenî ke hedefê polîsan de ya hinî bîya hedefê faşîstan zî. 16ê çeleyê 2024î de bado ke komeleya Bremenî raştê sereştişê polîsan ameye dima ra raştê hêrişê faşîstan ameye. Ma sey îdarayê DEM –FEDî veng danê dezgehanê eleqedaran û rêxistinanê huqûqî yê Almanya; komeleyanê ma krîmînalîzê mekerê.''

FED-KURDî zî bi eşkerayîyêke polîtîkayê krîmînalîzasyonî yê vera şarê kurdî şermezar kerdî. Eşkerayîye de ame vîrvistene ke badê sereştişê vera Komeleya Bremenî kurdêk ame destbendkerdene û dima ra Berlin de yew û Magdeburg de di kurdê welatperwerî ameyî destbendkerdene û ame vengdayene ke wa hêrişê vera dezgeh û şarê kurdî berê vindarnayene.