Hemserekê Pêroyî yê Komeleya Huqûqnasanê Seba Azadîye (OHD) Bunyamîn Şekerî derheqê tecrîd, birnayîşê telefonî, grevê vêşanîye û waştişanê tepişteyan ser o ANFyî rê qisey kerd.

Şekerî îfade kerd ke vera Rayberê Şarê Kurdî Abdullah Ocalanî tecrîdêko giran yeno kerdene û Îmrali de huqûqêko taybet yeno caardene. Şekerî da zanayene ke CPTyî no tecrîd tesbît kerd û vera ci vejîya.

Şekerî grevê vêşanîye yê vera tecrîdî vist vîrî û vat: ''Bi mîlyonan kesî seba Birêz Ocalanî têgêrenê. Çunke o çareserîya meseleyan o. Nê îdîayê serê weşîya ey zî nîyethol nîyê. No provakasyon o. Wextê grevê vêşanîye yê 2018î ra dima Birêz Ocalanî reyde 5 pêvînayîşî ameyî kerdene la reyna tecrîd ame caardene. Ganî cade keye, wasî û avûkatî Birêz Ocalanî reyde pêvînayîşan bikerê.''

Şekerî bale ante ser ke pêvînayîşê telefonî de wexto ke Abdullah Ocalanî dewlete rexne kerde telefon birîya. Şekerî vat: 'Birêz Ocalanî telefon de waşt ke avûkatanê xo bivîno la telefon ame birnayene. No zî mojneno ke Birêz Ocalan tepişteyêko sîyasî yo û yeno waştene ke têkilîya ci ya bi dinya bêra birnayene. Dewlete waşt wina bimojna ke tecrîd çin o û tepişteyî eşkenê pê telefonî qisey bikerê. Dewlete wazena tecrîd meşrû bikera. La rayaumûmîye weşîya Birêz Ocalanî meraq kena û qerqilîyena. Ganî cade avûkatî, wasî û keye bieşkê şorê Îmrali.''

Şekerî peynîya qiseykerdişê xo de reyna bale ante grevê vêşanîye yê tepişteyan ser û vat: ''Tepişteyî wazenê wa qanûnî bêrê caardene, tecrîd bêro wedaritene û dewlete waştişanê înan bîyara ca. No çi têna yê tepişteyan nê mesuldarîya ma ya pêroyînan a. ''