Endamê Komîteya Merkezî ya PKKyî Cemal Şerîkî ANFyî rê qisey kerd û rojdem ercna. Şerîkî verî şexsê Hakî Karerî de şehîdê menga gulane yad kerdî. Qiseykerdişê Şerîkî ra beşêk wina yo:

''Şarê Tirkîya û Kurdîstanî prosesêkê tarîxîyî de yê. Dewleta tirke nêeşkena mîyanê krîzî ra vejîya û her ke gamêke erzena hîna zaf kewena mîyanê bataxî. Kerdişê ci yê sîyasî û dîplomatîk, serebûtê fînansî, tedayê vera komelî, hêrişê îşxal û qirkerî bîyê sebebê nê aqîbetî. Derbanê gerîlayan ra dewlete her roje hîna zaf bin kewna. Xoverdayîşo pîl ê gerîlayan ra dewlete hema zî nêeşkaye hêrişanê xo ra netîceyêke bigêra. Dewlete xîret kena ke ney binimna û xo sey serkewte bimojna. La dinya alem binkewtişê ci zanena.

Doktor Şivan û embazê ci sînorê Vakur û Başûrê Kurdîstanî de wexto ke amadekarîya têkoşînî kerdêne hetê hemkarê dewleta tirke PDKyî ra kişîyayî. Nurhakan de zî Sînan Cemgîl û embazê ci hetê dewlete ra kişîyayî, Kizildere de Mahir Çayan û embazê ci zî hetê dewlete ra kişîyayî. Ez înan pêro bi rêzdarî yad kena. Sînan Cemgîl, Kadîr Manga û Alparslan Ozdoganî koyanê Nurhakan de bezreyê têkoşînê gerîlayan eştê û no têkoşîn ewro hetê gerîlayan ra yeno kerdene. Her gerîlayê Kurdîstanî Sînan Cemgîl, Kadîr Manga û Alparslan Ozdogan û Doktor Şivan o. Ma do bi awankerdişê welatêkê demokrat, azad û sosyalîstî armancê nê şehîdan bîyarê ca.

Gerîlayê ke ewro Zap, Avaşîn û Metîna de xo ver danê seba caardişê armancanê Sînan Cemgîl, Huseyîn Cevahîr, Mahîr Çayan, Denîz Gezmîş, Îbrahîm Kaypakkayayî têkoşîn kenê. Coka gerîlayî bi xoverdayîşê xo wayîrê şehîdanê şorişî vejîyenê.''