Endamê Komîteya Merkezî ya PKKyî Cemal Şerîkî ard ziwan ke îqtîdarê tirkî pêro rayîrê haştîye girewtî, qirkerdişî ra ber alternatîfêk ser o nêvindeno û bi pirodayîşê derban ê giranan haştîye eşkîyena bêra destvistene.
Endamê Komîteya Merkezî ya PKKyî Cemal Şerîkî bi wesîleya 1ê Êlule Roja Haştîye ya Dinya ANFyî rê qisey kerd.
Qiseykerdişê Şerikî ra beşêk wina yo: ''Dinya tewr zaf hewceyê haştîye ya. Dîktatorîyanê faşîstan dinya finaye sîstemêkê xirabî. Haştîye têna pê vatişî vila nêbena. Rojhelatê Mîyanênî de şerêko giran qewimîyeno û no şer tewr zaf tesîrê Kurdîstanî keno. Çarçewa nê şerî de xoza, kultur, ziwan û merdimê Kurdîstanî yenê qirkerdene. Vera naye pawitişê haştîye bi têkoşînêkê bi ruhê seferberîye yê vera dewleta tirke ya qirkere bena.
Dinya de Tirkîya nêeşkena çekuta haştîye bigêra fekê xo. Çunke nê vera yewbînan ê. Dewleta tirke Koçgirî de kurdê elewîyî qir kerdî, Mustafa Suphî û embazê ci Dengizê Sipî de xeniqnayî, çerkezî, asûr-sûryanîyî, rûmî, kurdî qir kerdî. Şer bingeyê dewleta tirke yo. Ewro zî no dewam keno. Vakur û parçeyê bînî yê Kurdîstanî binê îşxalê Tirkîya de yê.
Şarê kurdî vano temînatê haştîye Îmrali de yo. Serebûtanê ke tepişîyayîşê Rayber Apoyî ra dima qewimîyayî, îsbat kerd ke kurdî heqdar ê. Rayber Apoyî mîyanê şert û mercanê giranan de zî hetê haştîye de yo. La dewleta tirke tim xîret kena ke nê nêzdîbîyayîşê Rayber Apoyî seba menfaatanê xo bixebitna. Nê nêzdîbîyayîşê komplogerî ra û israrê şerê taybetî yê dewleta tirke ra tewr zaf kurdî zerar vînenê. Serebûtê ke 'prosesê dîyalogî yê 2013-2015î' de qewimîyayî, naye ra cîya nîyê.
Paradîgmaya 'ekolojîj-demokratîk û azadîpawitoxe' ya Rayber Apoyî bi xo bernameyê haştîye yo. Tecrîdê vera Rayber Apoyî komploya mîyanneteweyîye ya 21 serran a. Hêzê komplogeran seba ke verê haştîye bigêrê Rayber Apo tecrîd kenê.
Vera hêrişanê dewleta tirke gerîlayî bi hawayêkê xurtî xo ver danê. Yewinê îşxalkerî yê dewleta tirje Heftanîn de nêeşkenê gamêke bierzê. Dewleta tirke têna kurdan nê ereban zî qir kena. Şerê Armenîstan de zî hetê Azerbeycanî de ca gêna. Dengizê Sipî de şer kena. Şerî ra ber çekuyêke nêgêna xo fek.
Dewleta tirke çekuya 'haştîye' sey qelsîye vînena. Ganî têkoşînê vera dewleta tirke bi taktîk û stratejîyan bêro kerdene. No zî heqê ma yo meşrû yo.''
