Dewleta tirke ya îşxalkere 9ê tebaxe de bi droneyê çekdarî wesayîtêkê sivîlan rayîrê Dukan-Xelekanî yê Başûrê Kurdîstanî de dabi bombayan ver. Hêriş de hemwelatî Nejwan Ebdullah şehîd bibi. Vizêr qezaya Şarezûrî ya Silêmanî de seba Ebdullahî şîn ronîya.

Birayê şehîd Nejwan Ebdullahî, Pêşewa Ebdullahî derheqê hêrişanê dewleta tirke de Rojnewsî rê qisey kerd û vat: ''Dewleta tirke Başûrê Kurdîstanî îşxal kena, şarê ma qetil kena. La rixmê ney zî partîyê Başûrî yê sîyasîyî verê nê hêrişan de bêveng ê. 

Birayê mi hêriş de birîndar bibi, dima nêweşxane de şehîd bi. Her kes zaneno ke dewleta tirke dişmena kurdan a. Birayê mi oyo yewin nêbîyo ke dewleta tirke qetil kerdo. Nê hêrişê dewleta tirke do erdê Başûrî de dewam bikerê. Çunke verê ci de her kes bêveng o.''