Serrgêra 9. ya Fermanê 3yê Tebaxe de vizêr Sunûnê Şingalî de binê sernameyê ''Yewîya ma vera zilmî hêzê ma yo'' komxebatêke ameye kerdene.

Komxebete serkêşîya Koordînasyonê Pabesteyan û Hêzanê Şingalî de ke Partîya Azadîye û Demokrasî ya Êzidîyan (PADÊ), Yewîya Welatperweran a Kurdîstanî (YNK) û xeylêk partî û temsîlkerê şarî tede ca genê, ameyê organîzekerdene.

Komxebata ke bi seyan kesî tewrê ci bîyî de qiseykerdişê akerdişî de bale ameye atene ke muhîmîya yewîye ser û veng dîya Iraq ke wa vera Şingalî berpirsîyarîya xo bîyaro  ca û verê ci bêro akerdene ke komelê Şingalî xo bi xo îdare bikero.

Berpirsîyarê YNKyî yê Şingalî Davud Cindîyî ke bi nameyê koordînasyonî qisey kerd, bale ante plananê leyminan ê serê komelê êzdiîyan û Şingalî ser û vat: ''Rixmo ke serrgêra 9. ya fermanî ya hema bi des hezaran însanê ma kampan de ciwîyenê, agêrêşayîşê înan ê Şingalî yeno astengkerdene. Gerek hukmatê Îraqî paştî bido nê koordînasyonî. Qerarê ke derheqê Şingalî de teberê ma de yenê girewtene ma qebul nêkenê. Înanê ke verê fermanî îdîa kerdêne ke ma pawenê, ma destûr nêdanê ke ê derheqê ma de qale bikerê.''

Walîyê Musulî Enver Ali Gepo zî wina vat: ''Ma rîyê înan ra zaf dejî antî la ma heqê înan ra ameyî. Tarîx do têkoşînê koyanê Şingalî binuso.  Ma sey êzidîyan reyna fînenê vîrî ke meseleya Şingalî meseleyêka sîyasîyî ya.''

Temsîlkarê şîî Seyîd Mahmud El Erecî zî vat: ''Ganî ma mîyanê yewîye de têkoşînî rayra berê û Îdareyê Şingalê Xoserî hetî şarê Şingalî ra bêro îdarekerdene. Ganî meseleya mezelanê komkîyan bêra çareserkerdene û heqê şehîdanê fermanî bêrê dayene. Gerek êzidîyê ke destê çeteyanê DAÎŞî de yê bêrê xelisnayene.''