Meclîsê Xoserîya Demokratîke yê Şingalî kombîyayîşêk kerd û dima ra eşkerayîye daye û nê pare kerdî:

''Rixmo ke şarê êzîdîyan tim pê kulturê dostîye û wayûbiratîye nêzdî beno çi heyf ke zaf rey raştê fermanan ame. Tewr peynî de 2014 de pê destê çeteyan DAÎŞî hêrişê qirkerdişî ame kerdene ke û wext asayîşê Şingalî binê kontrolê PDK û hukmatê Iraqî de bi. Gama ke çeteyanê DAÎŞî hêrişê Şingalî kerd hêzê PDK û Iraqî remayî. Verî ke biremê zî çeke şarî destê înan ra girewtî. Coka berpirsîyarê fermanî nê wird hêz ê. Hêzanê PKK û YPGyî ke vazdayê hetkarîya ma, êzidîyî ferman ra xelisnayî.

Nê xoverdayîşî de sey Îdareyê Xoserî ma 390 şehîd dayî. 1060 şerwanê ma zî birîndar bîyî. Bi se hezaran êzidîyan bar kerd, bi hezaran cinî, extîyar û domanî ameyî remnayene. Tay ameyî qetilkerdene aqibetê tayînan zî hema zî nîno zanayene. Eşkerayo ke eke hêzê xopawitişî yê êzidîyan çînêbê hêzê Iraqî nêeşkenê Şingalî bipawê. Hînî înan rê bawerîya ma çîn a. Ma sey êzidîyan wazenê Iraq de xoser û azad biciwîyê. Goreyê Qanûnê Bingeyî yê Iraqî xora wina heqê ma zî esto.

Ma tim semedê statuyê Şingalî metodanê demokratîkan şuxulnenê û wazenê mesele pê dîyalogî çareser bikerê.La hukmatî herinda ma goştarîkerdişî de pîya bi Tirkîya û PDKyî planî kerî û 9ê teşrîna verêne de vera êzidîyan morê xo da binê komployî ro. Ma nê pêkerdişî red kenê. Mesele asayîş nê sîyasîye ya û çere statuyo xoser o.

Hukmatê Kazimî waştişê ma goştarî kedî û vat ê do nayî ser o bixebitîyê. Nika vanê ke hêzê Asayîşî wa heta 1ê nîsane ya 2021 biancîyê. No tarîx zî manîdar o. Nê tarîxî de gerîlayê HPGyî koyanê Şingalî ra vejîyayî bî. Îdareyê ma waştişê Iraqnî raşt nêvîneno û qebul nêkeno. Asayîş û hêzanê YBŞyî rê bawerîya şarê ma esta. Hewce nêkeno ke Iraq bêro Şingal. Xora hêzê ma yê xopawitişî estê. Koyanê Şingalî de cayê ma yê bimbarekî estê ke ma wazenê bi xo bipawê.

Hukmatê Kazimî ma bi şuxulnayîşê zorî tehdît keno. Reyna tay herêman de îdarekerî qala rişnayîş gonî kenê. Ma tehdîtanê çewî/e ra nêtersenê. Qet yew hêz nêeşkeno ma açarno halê verê fermanî.  Eke teberê dîyalog û muzakerayan de metodê bînî bêrê şuxulnayenê bêşik ma zî xo şarê xo pawenê. Ma şarê xo vera fermanan bêpawitiş û bêîrade nêverdenê.Coka ma waştişanê Iraqî red kenê. Ma ne Asayîşî tesfîye kenê ne zî verdenê hêzê bînî bikewê cayanê ma yê bimbarekan. Goreyê bawerîya ma çîyo wînayên nîno qebulkerdene.

Êkê hukmatê Kazimî vera êzidîyan hêz bişawo, ma do xover bidê.  Ma veng danê ke wa heme hetê sîyasîyî yê Iraqî û hêzê Kurdîstanî derheqê Şingalî de wa hîsgêr tewir bigîrê. Xora heta nika Neteweyanê Yewbîyayeyan (NY) zî rolê xo kay nêkerd, paştî daye polîtîkayanê Tikrîya hukmatê Kazimî. No zî meseleyan xorî keno. Ganî NY û dezgehê bînî mîyanneteweyî rolê xo kay bikerê û verê şer û bêîstîkrarîye bigîrê.''