Artêşa Iraqî dormeyê Şingalî de hêzanê xo ca keno  û rayîrê bingeyî girewtî. Şaro ke nêeşkeno rehet têbigêro û tengayîya pîle anceno vera nê qewimîyayîşan hêrsbîyaye yo.

Artêşa Iraqî şewa 18ê nîsane gama ke êzidîyan Roşanê Çarşema Nisanê bimbarek kerdêne hêrişê nûtayanê Asayîşê Êzidxanî yê Dîgurî kerd. Dima ra saetanê şewe de hêrişê hêzanê YBŞû YJŞyî kerd. Bado ke cewabê hêrişan ame dayene pêkewtişî qewimîyayî. Iraq hema zî keno Hêzanê Pawitişî yê Êzidîyan bêtesîr bikero. Eynî wextî de hêzanê xo Şingal de ca keno rayîran geno ke şar tengayî bianco.

Bi estbîyayîşê hêzanê Iraqî bitaybetî koçerî tengayî ancenê. Ê nêeşkenê mîyanê xo rehet biçerênê. Xwedêda Mirado ke dewa Bare de mîyan keno weye vera hêrişan nêrazîbîyayîşê xo mojna û vat seba ke artêşe dekewtiş û vejîyayîşî girewtî ê nêeşkenê rehet têbigêrê.

Miradî vat: ''Verî ke hêzê Iraqî ameyî herême rewşa Şingalî hetê asayîşî ra holêre bî. Şarê ma yo ke  wextê Fermanî de surgun bi, waştêne agêro herra xo û tîya biciwîyo. La seba ke Iraqî leşkerî şawitî herême û hêrişê Asayîşî kerd nê şar tersna. Ma sey şarê êzidî heta nika raştê  74 fermanan ameyî. Iraq herinda ma dir şerkerdişî de wa xizmet bikero ke şar agêro keyeyanê xo. Ma sey êzidîyan vera şerî yê. Şingal de wa şer mevejîyo. Çîyo winayên seba menfeatê ma nîyo. Ma hêver bê qesawet û tersî ciwîyayêne. La ni ka seba ke artêşa Iraqî tîya problemî vetî û xeylêk cayan de hêzê xo ca kerdî şar biqisawet o. Ma hêver mîyê xo her heta berdêne la nika destûr nêdane ma şirê qet cayêk. Eke Iraq mudaxaleyê Şingalî mekero, ma eşkenê xo bipawe û xo îdare bikerê. Hewce nêkeno ke ç wina zaf hêzê xo tîya cabikerî.''