Endamê Qerargehê Fermandarîya Herêmanê Pawitişî yê Medya Şivan Geverî derheqê hêrişanê îşxalî û têkoşînê gerîlayan de ANFyî rê qisey kerd.

Qiseykerdişê Geverî ra tay noqtaya girîngî wina yê:

''Destpêkê serre ra nata Herêmanê Pawitişî yê Medya de bi taybetî Zap de têgêrayîşê teyarayan zêdîyayî. Xora ma zanayêne ke dewleta tirke serra 100. ya Peymana Lozanî de hêrişê xo do bizêdîna. Artêşa îşxalkere 14-15-16ê nîsane de vera Herêmanê Pawitişî yê Medya têgêrayîşê hewayî yo hîra da destpêkerdene. Eşkera bi ke no xîretê îşxalê neweyî bi û merkezê ci Zap bi.

17ê nîsane de zî artêşa îşxalkere Zap de leşkerê xo ardî war û hêrişêko pîl da destpêkerdene. Dewleta tirke wina plan kerd ke gerîlayan çin bikera û pêro herême îşxal bikera. Par zî înan Garê de wina planêk kerdbi la bin kewtbi. Narey zî roja verêne ra gerîlayan xoverdayîşêko pîl mojna û planê dişmenî vindert, bi puç. Artêşa tirke hêrişê Kurojahro, Şikefta Birîndara, Şehîd Cûdî, Şehîd Ciwan, Karker, Zozanên Avaşînê, Werxelê, Çiyareş, Şehîd Rûstem û Şehîd Şahînî kerd. Dima zî hêrişê Boxazê Şîrînî û dormeyê dewa Mîrosî kerd. Dewleta tirke Mîros de 3 baregehê pîlî viraştî. PDKyî zî Boxazê Şîrînî de baregehêk rona. Dewleta tirke pê hetkarîya hemkarê xo waşt erdî ra netîce bigêra.

Taburêko bîn ê dişmenî Metîna de Girê Hekarî, Zap de Girê FMyî î Çiyareş de aver şi. Embazanê ma nê waran de xoverdayîşo bêhempa kerd. Hema zî pêkewtişî dewam kenê. Embazê ma şîyî cenazayanê dişmenî ser. Çiyareş de di mengî yo şer est o la dişmen nêeşka nêzdîyê Girê Cehenemî bibo. Taburêko bîn ê dişmenî herêma Cîlo de ame war. La ê nêeşkayî Şikefta Birîndaran de ca bidê xo. Coka dişmen neçare mend ke Kevirê Kunî de leşkeranê xo bîyaro war. Dişmenî bi taybetî Girê Şehîd Cûdîyî û Şehîd Ciwanî kerdî hedef. Dişmen nêeşka zaf hêrişê mewzîyanê ma bikero. Pêkewtişê pîlî zafêr netîceya hêrişanê gerîlayan de qewimîyayî.

Artêşa tirke pê pêro îmkananê xo hêrişê gerîlayan kena. Tunelanê şerî de vera embazanê ma çeka kîmyewîye û gazo kîmyewî şuxilîyeno. Dişmen wazeno pê hemkaran, qoricî û paramîlîteran netîceyêke bivisno destî. Gerîlayî pê xoverdayîşêkê pîlî têkoşîn kenê û do ser bikeqê. Na memge rixmê pêro xîretan zî artêşa tirke nêeşkaye leşkeranê xo bîyara war. Heta nika pêro planê înan bin kewtî. No şer şerê merg û mendişî yo. Coka ciwanê kurdî seba dîyarkerdişê qederê şarê xo hê têkoşîn kenê. No şer çend dewam bikero zî ma do seba pawitişê erjanê şarê kurdî, seba Kurdîstanê Azadî vera faşîzm û îşxalî heta peynî têkoşîn bikerê.''