Heyetê Haştîye yê Seba Pawitişê Kurdîstanî yo ke 7 kesan ra yeno pê, vera hêrişanê îşxalî yê dewleta tirke Başûrê Kurdîstanî de partîyanê sîyasîyan reyde pêvînayîş kerd. Endamê heyetî û Serekê CÎKî Hafiz Ahmet Turhalliyî pêvînayîşê înan ercnayî.

Heyet de Serekê Komelê Îslamî yê Kurdîstanî (CÎK) Hafiz Ahmet Turhalli, Prof. Dr. Salar Basîra, Sereka Yewîya Doktoran a Kurdan Zeynepe Bînîcî, şêwirmende û aktîvîste Ronake Azîz, Weqfa Linangan a Holanda ra hunermende Gloriosu Jun Saturay, Vervatoxê Enternasyonelê Averî Daniel Kopp û Çimdaro Sîyasî Yilmaz Pêşkevin Kaba cagênê. Heyetî Parlamentoyê Başûrê Kurdîstanî de komanê YNK, PDK û Tevgera Goranî de pêvînayîşî kerdî.

Serekê CÎKî Turhalliyî ard ziwan ke ê seba ke bale biancê hêrişanê kîmyewîyan ser, ameyî herême. Turhalliyî da zanayene ke ê Partîya Demokrasî û Azadîye ya Kurdîstanî, Partîya Komunîste ya Kurdîstanî û Partîya Zehmetkêşe ya Kurdîstanî de roniştî û înan hêrişê îşxalî bi zelalî şermezar kerdî. Turhalliyî eşkera kerd ke îna n PDK, YNK û Goranî reyde pêvînayîşî kerdî û nê partîyan zî vat ke ê nê hêrişanê îşxalî nêwazenê.

Turhalliyî vat: ''Bi taybetî Vervatoxê Kome yê PDKyî û pêro partîyanê bînan vat ke ê hêrişanê îşxalî ra aciz ê. Nê partîyan vist vîrî ke Tirkîya endama NATOyî ya û NATO paştî dano hêrişanê Tirkîya. Ma key pêvînayîşanê xo biqedînê raporê xo amade kenê.''

Prof. Dr. Salar Basîro ke zanîngehanê Silêmanî û Almanya de dersan dano pêvînayîşan ser o vat: ''Partîyan pêvînayîşan de ma rê vat ke nê hêrişê îşxalî vera estbîyayîşê neteweya kurdan tehluke yê. Ma pers kerd ke çira înan parlamento de vera hêrişan tewirê xo nêmojnayoo. Tewirê Goranî zelal bi. Labelê tewirê YNK û PDKyî zelal nêbi. PDKyî sey mesuldarê hêrişan PKK mojna û vat 'Eke PKK herême de nêbo Tirkîya zî hêriş nêkena.' ''

Wina pawîyeno ke heyet ewro Silêmanî de temsîlkaranê partîyan û roşnvîran de pêvînayîşan bikero.