Şirnex de 26ê temmuze de şewat vejîyabi û 8 rojan ra dima amebi hewnakerdene. 11ê tebaxe de zî Bêspin de şewat vejîya û şewat dewam keno.

Wekîlê Partîya Çep a Keske yê Şirnexî Mehmet Zekî Îrmezî derheqê babete de ANFyî rê qisey kerd.

Îrmezî îfade kerd ke şewatî qestî ra çarçewa operasyonanê leşkerîyan de yenê vetene û vat: ''Herêma ma de şewatî xo bi xo nêvejîyenê. Çarçewa operasyonanê leşkerîyan de nê şewatî yenê vetene. Coka vanê 'şewat nêgêrîyeno binê kontrolî.' Seba ke dekewtiş û vejîyayîşê herême qedexe yê şar nêeşkeno şewatî hewna bikero. Şewatî reyde sey Besta, Gabar û Cûdî herême de darî birîyenê. Nê darî binê çimdarîya leşker û qoricîyan de birîyenê û erşawîyenê herêmanê bînan.''

Îrmezî ard ziwan ke di hewte yo wextê operasyonanê leşkerîyan de şewatî yenê vetene û operasyonî biqedê zî leşkerî kule, qereqol û kalekolan ra guleyan erenê herême. Îrmezî vat: ''Şewatê daristananê dewa Bilbêsî netîceya bombardumanê teyara û helîkopteran de vejîya. Seba ke qedexe est bi şar nêeşkena bikewo herême û şewatî hewteyêk dewam kerd. Bê destûrê cendirmeyan dewijî nêeşkenê şorê axpînanê xo zî. Nê herêmî serranê 90an de ameybî xalîkerdene. La bax, baxçe û axpînê merdiman hema zî uca de yê. Şewat resayo nê bax û baxçeyan zî û zerar dayo nînan. 

Heta ke peynîya ablûqa û qedexeyan nêra zerarê şewatan do nêrê tesbîtkerdene. Ma Têgêrayîşê Ekolojî yê Mezopotamya de qisey kerd. Înan vat ke ê do hem derheqê şewatê Şirnexî de hem zî derheqê şewatanê pêro herêman de planêkê çalakîyan bikerê. Sey Partîya Çep a Keske ma zî qerardar ê ke tewrê nê planî bibê. Ma do verê nê kerdişan de bêveng nêmanê.''