Rêxistina DEM Partî ya Agirî Meydanê Dortyolî de Newroza pîle û mîtîngê xo yê fînalî kena. Şarî meydan kerd de û bi deyîran govende girewte. Meydan de pankartî ameyî akerdene û sloganê sey ''Bijî Serok Apo'' ameyî vatene.

Namzedê Şaredarîya Agirî yê DEM Partî Mehmet Akkuşî şayîye de qisey kerd û vat: ''Ma her kesî de qisey kerd. No şaristan hetê AKPyî ra ame texrîbkerdene. AKPyî çimeyê şaristanî diznayî.  Ganî şarê ma nê dizdan rê cewabêkê pîlî bido.''

Namzeda Şaredarîya Agirî Hazale Aras vat: ''Ma do 31ê adare de şorê weçînayîşêkê krîtîkî. Ma do şaredarîya xo apey bigêrê û Agirî cinî û ciwanan reyde îdare bikerê.''

Aktîvîsta TJA Dîlane Guvenç zî vist vîrî ke adare menga xoverdayîş û têkoşînî ya û vat: ''Ma bi tecrîdê Îmraliyî, hêriş û tedayan na Newroze pêşwazî kerde. La bedelê ci se beno wa bibo ma do xoverdayîşî ra fek vera nêdê.''

Şayîye de mesajê Newroza 2013î yê Rayberê Şarê Kurdî Abdullah Ocalanî ame wendene.

Hemserekê Pêroyî yê DEM Partî Tuncer Bakirhanî zî qiseykerdişê xo de vat, 31ê adare de êyê ke vera şarê kurdî û kurkî dişmeyîye kenê, şer-pêkewtiş wazenê do cewabê înan bêro dayene.