Kelaya Wanî pisîngê Wanî û Gola Wanî reyde sembolêka Wanî ya. La kela qederê xo rê terikîya. Kelaya Wanî wextê Darbeya 12ê Êlula 1980î de dîyaye bombayan ver û serranê 90an û 2000an de zî bîye warê cigêrayoxanê define û tîryakîyanê kundoxî. 

Kelaya Wanî nişka ra seba AKPyî bîye 'ercîyaye!' AKPyî cade seba Kelaya Wanî bira pawitişî girewte û dima seba viraştişê baxçeyê milet û parka miletî dest pêkerd. Dormeyê kela vurîya şantîye, darî birîyayî.

Serekê Çev-Derî yê Wanî Alî Kalçikî derheqê babete de agahîyî dayî û vat: ''Awanîya xozayî ya Kelaya Wanî xeripîyena. Kelaya Wanî cigêrayoxanê define û tîryakîyan rê terikîyaye qet sey 'eserê tarîxî' nêdîyaye. Vakurê Kelaya Wanî de baxçeyê vaşanê awe esto û no ca warê SÎTî yo. La uca de nika darî birîyenê. Pêro cayê tarîxî yê Wanî yenê rijnayene. Dormeyê kela bi temamî ame girewtene. Hetê vakurî yê kela de seba parka miletî û baxçeyê miletî xebatî estê. Îhaleyê baxçeyê miletî newe yeno kerdene. Dormeyê ci pê kerreyan ame girewtene. Binê nameyê pawitişî de Kelaya Wanî yena talankerdene û vurîyena warê bazirganîye.''

Kalçikî qiseykerdişê xo rê wina dewam kerd: ''Dormeyê kela pê telan girewte yo.Çira dormeyê Koyê Erekî nêvirazîyeno la waro hîtîn ê kela yena zûwakerdene? Nê cayî warê hakkerdişî yê. Bi nê hawayî peynîya cuya bi mîlyonan yena ardene.''