Şaristanê Silêmanî yê Başûrê Kurdîstanî de Endama Merkezê Cigêrayîşî yê Jineolojî û Akademîsyene Nagîhane Akarsel hêrişê çekdarî de ameye qetilkerdene.

Goreyê agahîyan ewro saete mabênê 10.00-11.00 de verê keyeyê ci de vera Nagîhane Akarsele hêrişo çekdar ameyo kerdene.

Edîtora Kovara Jineolojî, Endama Merkezê Cigêrayîşî yê Jineolojî û Akademîsyene Nagîhane Akarsel hêriş de dinyaya xo bedilnaye û cenazaya aye wedarîyaye Dezgehê Tipê Edlîyî yê Silêmanî.

Akarsela ke Konya ra bîye, karê rojnamegerîye, nuştoxîye û kovare kerdbî. Aye heta nika morê xo dabi xeylêk xebatanê girîngan û çend serrî yo Silêmanî de seba amadekerdişê Akademîya Jineolojî xebitîyayêne.

Akarsele hetê bînî ra zî seba awankerdişê kitanxameyê cinîyan zî xebitîyayêne.

Hêzanê asayîşî warê qetilkerdişî de cigêrayîş da destpêkerdene.

Silêmanî de 16ê êlula 2021 de hemwelatîyê Vakurê Kurdîstanî Ferhat Bariş Kondu, 17ê êlula 2021î de Endamê Komîteya Keyeyanê Şehîdan a PKKyî Yasîn Bulut û Şukrî Serhed, 17ê gulana 2022yî de hemwelatîyê Vakurê Kurdîstanî Mihemed Zekî Çelebî, 28ê tebaxa 2022yî de Endamê Konseya Rayberdişî ya Tevgera Azadî Suheyl Xurşîd Ezîz (Mamosta Şemal) ameybî qetilkerdene. Dîya zanayene ke nê qirkerdişî hetê MÎTî ra ameyî kerdene.