Aktîvîstanê herêma Çemçemalî ya Başûre Kurdîstanî vera hêrişanê îşxalî yê dewleta tirke nêrazîbîyayîşê xo mojna. Aktîvîstan ANFyî rê qisey kerd û fikrê xo ardî ziwan.

Aktîvîst Aram Şêx Ezîzî vat: '' Tirkîya tim wazena kurdan qir bikera û nêwazena kurdî bibê wayîrê statuyî. Heyf ke sere de hukmatê Herêma Kurdîstanî parlamento, partîyê sîyasî û sîyasetmedarî vera nê hêrişan bêveng ê. Semedê tengîya ekonomîke ya Başûrê Kurdîstanî Tirkîya firsend dî û hêriş kerd. Ganî pêro partî, dezgeh û kesayetî vera nê hêrişan vengê xo vejê û vera îşxalê Tirkîya bibê wayîrê tewirêkî.''

Aktîvîst Pêşewa Şêx Reufî vat: ''Nê hêrişî vera pêro kurdan û erdê Kurdîstanî yê. Nê hêrişî armanc kenê ke pêro erdê Kurdîstanî îşxal bikerê. Medyaya kurdan zî nê hêrişan de rolê xo nêana ca û vera îşxalî şar şîyar nêkena.''

Aktîvîst Karwan Osman Şawanîyî vat: ''Armancê Tirkîya o yo ke Kurdîstanî bikera Tirkmenîstan, pêro kurdan qir bikera. Wextê ci ameyo ke kurdî pê tewirê yewîya neteweyî têbigêrê çunke nê hêrişî vera pêro kurdan ê.''