Vera Vakur û Rojhelatê Sûrîye îşxalanê Dewleta Tirkan ke destpêkerd dima dîmenê hovîya înan çapemenîye de ameybî weşanayene. Îşkenceya ke merdimanê ke ameyê qetilkerdene rê yena kerdene, sewîya îşxalkerîya Tirkîya nîşan da. Bi taybetî zî îşkenceya ke cenaza Sekretera Pêroyî ya Partîya Demê Ameyoxî yê Sûrîye Hevrîne Xelef rê ameya kerdene bî sebebê nerazîbîyayîşanê pêroyî yê mîyanneteweyî. Alimanê dînî Amed de hovîya ke ameya kerdene nirxnaye.

Mele Mehmet Emîn Kiliçî ard ziwan ke çîyo ke Dewleta Tirkan pêro parçeyanê Kurdîstanî de kena çirey eleqeyê xo bi dîn û merdimîye çin o û nîşan kerd ke birrê Dewleta Tirkan gore huquqê cîhanî nîyê. Kiliçî dîyar kerd ke Dewleta Tirkan seba ke zulmê xo dewam bikera na yewe kena.

Kiliçî bale anite sîstemê biproblemî yê Tirkîya ser û vat: “Hz. Elî vano, ‘demo ke çeke destê tersonikan de ba, demo ke mulk destê çimvêşanan de bo, demo ke desthilatdarî destê lawazan de ba o taw sîstemê dinya beno xirabin. Çirey bi Îslamîyetî eleqeyê xo çin o ke şerêkî de heqê merdimanê bêguneh û sîvîlan bigîrîyê binê payan. Rewşêka winasîye de ganî çirey nêzdîyê cinîyan, doman û kalan mebo. Peyxamberê ma Hz. Muhemmedî bi xo zî tewrê şerî bîyo labelê heqê merdimanê bêgunehan çirey nêgirewtê binê payan.

'Vera Zulmî Wirzerê Payan Ser‘

Seyda Haci Kadahî vera kurdan hovîya Dewleta Tirkan û cerganê aye nirxnaye û vat: “Tena kesê ke merdimîye ra vejîyê eşkenê cenezeyan rê îşkence bikerê. Cayê vera şaranê bînan bi kîn û nefret tevgerayîşî Îslamî de çin o. Gore dînê Îslamî ganî merdimî vera zulmî wirzê payan ser. Senî ke nimêj, zekat, hec, kelîmeî şahadet û roje muslumanan rê ferz o vera zulmî vinetiş zî winî ferz o.”

Seba Yewîya Neteweyî Vengdayîş

Kadahî nîşan kerd ke dînê Îslamî de rast a zî cayê çîyanê ke nika qewemîyenê çin o û vat: “Ma şarê xo ra naye pawenê ke bêşert û merc ganî yewîya xo bîyarê were. Şarê kurdan bi taybetî zî alimê dînî ganî seba yewîya neteweyî bigurîyê.”