Rîyê dormegirewtişê Kampa Multecîyan a Mexmûrî ra vizêr domanêka 5 aşmeyî ya astengdare û nêweşa girane wefat kerd.

2 aşman ra zêdêr o ke asayîşê Hêwlerî yê pabesteyê PDK'yî dekewtiş û vejîyayîşê Kampa Multecîyan a Mexmûrî qedexe kerd û şarê kampe binê dormegirewtişî de ciwîyeno. Heta nika rîyê astengkerdişanê asayîş ê Hewlêrî ra çend domanî merdî. Derguşa 5 aşmeyî ya bi nameyê Zeryan Bulute, nêweşîya aye ya zerrî nefestengî estbî. Yeno vatene ke Zeryane seba ke rew ameye dinya, astengdar bîya. Goreyê zanayîşanê keyeyî, ganî Zeryane tim binê kontrolê doktoran de bibîyêne. Keyeyî rîyê dormegirewtişî ra nêeşkayo Zeryane bi aşman seba kontrolî bero nêweşxane. Vizêr rewşa Zeryane giran beno û keye wazeno ke aye bero bi nêweşxane. La asayîşê PDK'yî serê rayîrê Mexmûr û Hewlêrî de bi saetan keye vinderneno. Dimayê xîretanê keyeyî û raporê weşîye zî keye çend saetan yeno vindernene û destûr yeno dayene ke keye derbasê Hewlerî bibo. La seba ke erey resenê, nêweşxane Zeryane rê çare nêbeno. Keyeyê Bulute dazaneye ke rewşa domana înan giran bîya û raporê doktoran zî estbi, doktorê Nêweşxane yê Raperînî dimayê saetan domane rê ewnîyayê. Rîyê peygoşîya doktoran ra zî nêeşkayê domana xo bixelisnê.