Heyetê Îdareyanê Herêmîyan ê Demokratîkan ê HDPyî bi wesîleya serrgêra tayînkerdişê qayûman de vizêr Kuçeyê Lîseyî de eşkerayîyêke daye. Eşkerayîye ra verî hêzanê dewlete rayîrî girewtî. Vervatoxa Meclîsê Ciwanan ê HDPyî Dêrsime Dag, Serekwekîla Koma HDPyî Merale Daniş Beştaş, Hakki Saruhan Oruç, Mehmet Ruştû Tiryakî, hemşaredar, endamê meclîsê şaredarîye û rêxistinê HDPyî yê Amedî zî tede xeylêk kesî tewrê eşkerayîye bîyî.

Hêverî Hemserekê HDPyî yê Amedî Zeyyat Ceylanî qisey kerd û îfade kerd ke ê reyna qeyûman rê vanê nê.

Dima Hetkarê Hemserekanê HDPyî yê Berpirsê Heyetê Îdareyanê Herêmîyan ê HDPyî Mehmet Ruştu Tîryakîyî qisey kerd. Ruştuyî pare kerd ke qeyûmî îradeyê şarî xesp kenê û ganî merdimî vera ney vengê xo vejê û vat: ''Şaredarê ke hetê şarî ra ameybî weçînayene wezîfe ra ameyî girewtene. Eke vera nê kesanê ke dest na îradeyê şarî ser, têkoşîn nêro kerdene siba ney bîr no çi bêro sereyê her kesî.''

Vervatoxa Meclîsê Ciwanan ê HDPyî Dêrsime Dag ard ziwan ke ê do tim vera rejîmê qeyûman têkoşîn bikerê û vat: ''Qeyûmî hêrişê dezgehanê cinîyan û ciwanan kenê. Wazenê şexsê ma de sîstemê ma yê hemserekîye çin bikerê. Hemserekîye xeta ma ya mor a. Qeyûm do reyna şoro.''

Dima mektubê Hemşaredaranê Amedî Selçuk Mizraklı î Hulya Alokmen Uyanik ameyî wendene.

Tewr peynî Saruhan Oluçî qisey kerd û da zanayene ke ê do pê têkoşînî wayîrê îradeyê xo yê sîyasîyî vejîyê û bi nê hawayî do ser bikewê.