Amed de 1ê Gulane serkêşîya Konfederasyonê Sendîkayanê Kedkaranê Umûmîye (KESK), Platformê Şubeyan ê Dîyarbekîrî, Temsîlkarîya Konfederasyonê Sendîkayanê Karkeran ê Şorişgêran (DÎSK) û Yewîya Odayanê Muhendîs û Mîmaran (TMMOB) de, bi şîarê 'Ma do pîya bivurnê' yeno fîrazkerdene.

Serê sibayî ra nata bi hezaran kedkar û karkerî sey kortejan ver bi warê 1ê Gulane Meydanê Îstasyonî şinê. War de pankartê sey 'Keda ma rûmetê ma yo', 'Kede yê ma yo, vate ê ma yo', 'Nê îqtîdarî de ma nêeşkenê xo bidevirnê', 'Welat zengîn, şar feqîr, hemkar şay o' ameyî daliqnayene. Girseyî vera slogananê sey 'Biciwîyo 1ê Gulane', 'Biciwîyo Xoverdayîşê Karkeran', 'Dizd û kiştox AKP', 'Cinîye, Cuye Azadîye' vatî.

War de kedkar û karkerî 3 noqtayanê polîsan de yenê cigêrayene.

Hetê bînî ra Komeleya Rojnamegeranê Dîcle Firatî (DFG), DBP, Sendîkaya Rojnamegeran a Tirkîya, KESK, Egitim-Sen, TMMOB û sendîkayê bînî sey kortejan kewtî war. Meclîsê Ciwanan ê HDPyî zî vera hêrişanê îşxalî yê serê Başûrî pê pankarta 'Yewîye ra serfîrazîye, îxanetî ra kolonyalîzm vejîyeno' dekewt war.

Mîtîngê 1ê Gulane de Wekîla HDPyî Dêrsime Dag, Endamê Komîteya Amadekarîye Kamuran Taş, Endama Heyetê Rayberdişê Merkezî yê KESKî Gonule Kural û Endamê TTByî Halîs Yerlîkaya do qisey bikerê.

Qiseykerdişan ra dima zî Azad Bedran û koma muzîkî ya Egitim-Senî do vejîyê sehne ser.