Qezaya Rezanî ya Amedî de Parka Newroze de bi şîarê 'Wurze We, Wext wextê azadî û serkewtişî yo' Newroze yena fîrazkerdene. Meydan de qasê mîlyonêk kesan adirê Newroze gir kerd û  slogana ''Bijî Serok Apo'' qîrayî.

Dayîkê Haştîye yê ke semedê azadîya Rayberê Şarê Kurdî Abdulah Ocalanî Nobeta Edaletî tepişenê, înan zî warê Newroze de cayê xo girewt. Şayîye de mesajê tepişteyanê grevê vêşanîye ameyî wendene.

Şayîye de hêverî aktîvîsta Têgêrayîşê Cinîyan ê Azadan (TJA) Aynure Sarica qisey kerd û vat ke na Newroze do biba wesîleya azadîya Rayberê Şarê Kurdî Abdullah Ocalanî.

Hemserekê Kongreya Komelê Demokratîkî (KCD) Berdan Ozturkî vat: ''Seba azadîya Kurdîstanî û kurdan yewîya neteweyî şert a. Seba azadîya kurdan azadîya Ocalanî şert a û çareeserîya meseleya kurdan şert a.'' Dima hunermende Xezale Mistefa vejîyaye sehne ser û endamanê DEM-GENÇî rayraşîyayîş kerd.

Namzedê Şaredarîya Amedî yê DEM Partî Serra Bucak û Dogan Hatun bi çepikan vejîyayî sehne ser. Serra Bucak îfade kerd ke ê do qeyûman ra Amedî apey bigêrê û vat: ''Na Newroze wa biba wesîleya yewîya kurdan.''

Dogan Hatunî vat: ''Wa her kes bizano ke kurdî azadîye wazenê. Ma do wayîrê sindoqan vejîyê û nêverdê ke îradeyê ma bêro destvistene.''

Hemsereka DBPyî Çîgdeme Kiliçgun Uçar bi kirdkî qisey kerd û ard ziwan ke Newroze 'wijdan, xoverdayîş û azadîye' yo.

Şayîye de erjnayîşê Rayberê Şarê Kurdî Abdullah Ocalanî yê Newrozanê verênan hetê Hemvervatoxê HDKyî Cengîz Çîçekî ra ameyî wendene.

Xeylêk hunermandan zî bi deyîranê xo reng da şayîyî. Hemwelatîyan bi deyîran mirda govende girewte.