Amed de verba destsernayîşanê şaredarîyan û qeyûman Nobeta Demokrasîyî roja 36'ine de dewam kerde.  Nobete Cehdeyê Lîse de ameye viraştene. Parlamenterê HDP'yî, aktîvîstêTJA, Mayê Haştîye, îdarekarê 12 şaristanan ra Komeleya 78'an û bi seyan kesî tewrê nobete bîyî. Cayo ke çalakî tede ameye viraştene, polîsan der û dorê ci girewt.

Hemsereka HDP'yî ya Amedî Hulya Alokmene beşdaran rê sipasî kerd û vat: "Ma peyê rastîye de yê û ma do têkoşînê na rastîye ca nêverdê." Vervatoxê Komeleya 78'an Celalettîn Canî zî çalakîye de qisey kerd û bale ante serê weçînayîşê herême yê 31'ê Adare. Canî vat: "Vernîya weçînayîşî seba ke hemşaredar nêşikîyê mazbata bigêrê, nuşte înan rê erşawit. Destpêkî ra heta nika îradeyê şarê Kurdan nêno naskerdene. Bê xebera qerarê Mehkema, herinda şaredarîyan de qeyûmî ameyî tayînkerdene. Wexto ke babete Kurdî bê, qet goreyê Qanûnê Bingeyênî tê nêgêrenê." Canî bale ante ke AKP rijîyeno û vat ke "Rayberê Şarê Kurdî Abdullah Ocalanî pêvînayîşo peyên de îfade kerd ke o seba haştîye amade yo. La selahîyetdaran qeyûmî ser şaredarîyan wezîfedar kerd û bi nê hewayî cewab da Ocalanî.'' Nobeta Demokrasîyî dimayê çalakîya roniştişî ya 10 deqayan qedîyaye.