Deklarasyonê Newroza 2024î Amed de, Komeleya Kultur û Hunerî ya Dîcle de bi kombîyayîşê çapemenîye ame eşkerakerdene. Têgêrayîşê Cinîyan ê Azadan (TJA), DEM Partî, Kongreya Komelê Demokratîkî (KCD) û DBPyî deklarasyon pîya eşkera kerd. 

Eşkerakerdişê deklarasyonî de Hemserekê KCDyî Berdan Ozturk, Hemereka DEM Partî Tulaye Hatîmogullari, Hemsereka DBPyî Çîgdeme Kiliçgun Uçar û aktîvîsta TJA Dîlane Guvenç amade bîyî.

Wendişê deklarasyonî ra dima Dîlane Guvenç qisey kerd û pare kerd ke Newroze seba şarê kurdî roşanêko qedîm o û vat: ''Newroze nîşaneya xoverdayîşê vera zaliman a. Cayêk de xoverdayîş û têkoşîn est bo uca de Newroze zî est a. Coka Newroze xoverdayîş o. Ma emser ancî Newroze prosesê tedayêka girane de pêşwazî kenê.''

Hemsereka DBPyî Çîgdeme Kiliçgun Uçar bi kirdkî-kirmanckî qisey kerd û vat: ''Nêzdîyê 25 serrî yo Îmrali de Birêz Abdullah Ocalan tecrîdkerde yo. No tecrîd faydeyêkê senînî dano welatî? Faydeyê ci çin o. Ganî tecrîd biqedo ke haştî û azadîye bêrê. Sey têkoşeran ganî ma tecrîdî biqedînê. Ma azadîya Rayber Apoyî bîyarê ca. Ma seke 8ê Adare de vatbi Newroze de zî vajê 'meseleya kurdan rê çareserîye, Abdullah Ocalanî rê azadîye.' Seba çareserîya meseleya kurdan ganî Birêz Ocalan azad bibo.''

Tulaye Hatîmogullari zî bi erebkî Newroze fîraz kerde û vat: ''Ma do tim çareserîya demokratîke-haştîyane de israr bikerê, têkoşînê xo pîlêr bikerê.''

Tulaye Hatîmogullari bale ante grevê vêşanîye yê zîndanan û çalakîyanê Nobeta Edaletî ser û vat: ''Meseleya kurdan bi metodanê haştîyane û demokratîkan ganî bêra çareserkerdene.''