Roşanê Neweroze bi rojan o yeno bimbarekkerdene. Sey her serre emser zî do 21 ê Adare de Amed do bi tewrbîyayîşê se hezaran Newroze bêro bimbarekkerdene. Par rîyê janî ra şayîya Neweroze nêameye kerdene. Emser yeno pawitene ke do şayîya pîle bêro kerdene.

Komîteya Amadekarîya Newroze ya Amedî ra Hemserekê DBPyî yê Amedî Mehmet Bakirî ke ANFyî rê qisey kerd ard ziwan ke semedê Newroza Amedî heme amadekarîyî ameyî kerdene û tedbîrî ameyî girewtene.

Bakrî vat: ''Newroze semedê kurdan hem roşan hem zî sembolê ganîbîyayîşî yo. Newroze azadîye û newebîyayîş o. Seba ke par Newroze rîyê janî ra nêameye kerdene şarê ma bi coşê pîlî paweno. Coka ma wazenê ke şarê ma waştişê xo yê azadîye pê tîlîlîyanê Newroze bîyaro ziwan. Heta ewro ma heme Newroze xo serberz pê serkewtişî kerdî û wazenê emser zî wina bo.

Ma şarê xo ra rîca kenê ke wa maskeyanê xo pakerp û kodê HESî xo vîr a nêkero. Rîyê janî ra êyê ke rîskê nêweşîye esta do nêgêrîye warê Newroze. 5 berê dekewtişê warî estê. Ma do nê beran de bipawê û  êyê ke bê maskeyê înan rê maske zî vila bikerê. Reyna do standê ma yê dezenfekteyî zî bibê. Ma tedbîrê xo girewtî la ganî şarê ma zî dîqet bikero. Wa şarê ma pê kincanê xo yê neteweyîyan, pê rengê xo tewrê şayîye bibo. Eke problemêk bibo embazê ma yê wezîfedarî do eleqedar bê.''