Rêxistina  HDP'yî ya Amedî  ewro waşt ke verê bînaya şaristanî ya HDP'yî de eşkerayîyêka verba îşxalkerdişê Vakur û Rojakewtena Sûrîye  bidê. Polîsanê ke zanayêne eşkerayîye saete 11.30 de bêra kerdene, verê bînaya partîye girewt û destûr nêda ke çew bivejîye teber û hêriş kerd.

Wareyo hera yê verê bînaya HDP'yî pê TOMA'yan û wesayîtanê polîsan ame dekerdene û polîsan dormeyê bînaye girewt. Polîsanê ke qerarê walîtîye yê sey semedî mojna kesanê ke waşt bivejîyê teber û eşkerayîye bikê rê pê copan û gazî hêriş kerd. Hêriş de zafê kesî rîyê gazî ra xo ra kewtî û grûbe ver a slogana "Wa Biciwîyo Xoverdayîşê Rojawanî" vate. Pêvînayîşê wekîlanê HDP'yî yê walîtîye reyde bênetîceyî mendî. Wekîlê HDP'yî Salîha Aydenîz, Dêrsim Dage, Remzîye Tosune, Semra Guzele û Mûsa Farisogûllari verê bînaye de wextêk roniştî.

Seba ke destûr nêame dayene ke eşkerayîye bêra kerdene, vindertişê wekîlanê HDP'yî û partîyayîjanê ke zereyê bîna de bîyî, qedîyayo labelê dormegirewtişê bînaye hema dewam keno.

Grûba ke verê bînaya HDP'yî de ci rê çalakîya roniştişî dîyena viraştene, pê kerrayan hêrişê bînaya HDP'yî kerd.