Serkêşîya Kongreya Demokratîke ya Şaran (HDK), Kongreya Komeleê Demokratîkî (KCD), Têgêrayîşê Cinîyan ê Azadan (TJA), HDP, DBP û MED-TUHAD-FEDî de bi şîarê 'Ma do vera polîtîkayanê tecrîdî, seba pawitişê azadîye ver bi Gemlîkî şorê' siba Rayraşîyayîşê Gemlîjî do bêro kerdene.

Amed û Riha de venga şarî ame dayene ke wa vera tecrîdkerdişê Rayberê Şarê Kurdî Abdullah Ocalanî tewrê Rayraşîyayîşê Gemlîkî bibo.

Amed de bi beşdarîya wekîlanê HDPyî, eşkerayîyêke ameye wendene. Wekîlê HDPyî Kemal Bulbulî eşkerayîye de qisey kerd û venga partîyanê muxalefetî da ke eke demokrasî wazenê wa tewrê rayraşîyayîşî bibê û operasyonanê teberî rê destûr nêdê. Bulbulî vera astengkerdişê polîsan zî nêrazîbîyayîşê xo mojna û vat: ''Ma têna wazena meseleya kurdan bêra çareserkerdene.

Eşkerayîye ra dima mîtîngêk ame kerdene û sloganê sey 'Her ca Îmrali, her ca xoverdayîş' ame vatene. Polîsan hêrişê girseyî kerd û 11 kesî destbend kerdî, berdî Mudirîya Asayîşî ya Amedî.

Riha de zî girseyo ke seba tewrbîyayîşê Rayraşîyayîşê Gemlîkî kewtbi rayîr Sêwrege de ame astengkerdene. Girseyî dima bi sloganan dest pê rayraşîyayîşî kerd û merkezê Sêwrege de eşkerayîye daye. Endama Meclîsê Mayanê Haştîye yê Riha Hadle Ogur tîya de vera astengkerdişê leşkeranê tirkan nêrazîbîyayîşê xo mojna û îfade kerd ke heta ke Abdullah Ocalan azad bibo ê do têkoşînî rê dewam bikerê. Îdarekarê HDPyî yê qezaya Bozova Mehmet Ekîncîyî zî eşkerayîye de qisey kerd û tecrîdê Îmraliyî şermezar kerd.