Platformê Bawerîyanê Mezopotamya bi eşkerayîyêka nuştekîye hêrişê vera Şengalî şermezar kerdî.

Eşkerayîya Platformê Bawerîyanê Mezopotamya wina ya:''Seke yeno zanayene sînorêkê dişmenîya dewleta tirke ya vera kurdan çin o. Dewleta tirke wazena ke kurdan çin bikera û seba naye pêro metodanê gemarinan xebitnena. Dewleta tirke kena ke qesasê DAÎŞî bigêra ke şerê Rojawanî de bin kewt. DAÎŞî waştbi ke Şengal de şarê ma qir bikero la ser nêkewt û rastê têkoşînê şerwananê ma amebi. Seba ke DAÎŞ bin kewt na reye Tirkîya bi xo vejîyaye meydan. Dewleta tirke ya barbar a ke wazena kokê şarê ma bîyara pêro têgêrayîşan û kerdişanê bêexlaqan xebitnena.

Dewleta tirke ya faşîst û barbare kena ke şarê ma yê Şengalî bi nê hêrişanê xo bitersna û bikera ke şarê Şengalî koç bikero. Armancê nê hêrişan ê bêexlaqan no yo. Dewleta tirke ya faşîste û bêhîşmendîye wazena ke Kurdîstano ke tede zaf bawerîyan û mezheban pîya ciwîyenê çin bikera. Seba ma û merdimîye pawitişê Kurdîstanî zaf girîng o. Seba pawitişê Kurdîstanî ganî her kes vera nê hêrişan têkoşîn bikero. Ma venga pêro bawerdaran, şarê xo û pêro merdimîye danê ke bêrê û nê barbaran vindarnê. Ma wazenê ke Şengal û Rojawan perayîşê teyarayan ra bêrê qedexekerdene û nê qirkerdişî bêrê vindarnayene. Ma venga pêro merdiman danê ke vera na dewleta cergan û kiştoxan têkoşîn berz bikerê."