Herêmanê Pawitişî yê Medya de her roje xeylêk leşker û qoricîyî kişîyenê la nê kişteyî nimîyenê. 

Tugayê Komandoyan ê Koyî yê Colemêrgî û Leşkergehê Fatîhî zî nê baregehanê bingeyînan ra yew o ke şer de şuxilîyeno. Nê baregehan de temamîya roje de amadekarîyê leşkerî yenê kerdene; leşker û qoricîyî yenê berdene bi waranê şerî. Leşker û qoricîyê ke kişîyenê zî cenazayê înan yenê berdene bi baregehan.

Seba cenazayan bi beşdarîya amîranê dezgehanê dewlete merasîm ameyêne kerdene. Tewrbîyayîşê amîranê dezgehan mecbûrî bi. Eşkera bi ke wextanê peyênan de seba kişteyan meraîm nêno kerdene û cenazayî binê bêvengîye de yenê definkerdene. Cenazayê tay leşkeran zî herinda Colemêrgî de erşawîyenê Wan.

Çimeyêkî pare kerd ke her roje û şewe bi desan helîkopterê leşkerî baregehê leşkerî ra kewenê hewayî yan zî yenê war û vat: ''Wisarî ra nata cenazayê bi seyan leşkerî ameyî. Ma hînî fam nêkenê ke kamyew helîkopter cenazayan ano. Cenazayî bi bêvengîye yenê erşawitene. Cenazayî rayaumûmîye rê nimîyenê la ma her çî vînenê. Hûmara cenazayan hende zêde ya ke ê zî neçar menenê ke binimnê.''