Gevrîye Akguça 91 serre dewa Enhîle ya qezaya Mîdyadî ya Mêrdînî de hetê kesanê nenasan ra amebî qetilkerdene. Gevrîye Akguça ke bi welarperwerîya xo şinasîyayêne verê cû hetê qoricîyan ra amebî gefwerdene.

Wekîlê HEDEPî yê Mêrdînî George Aslanî derheqê babete de ANFyî rê qisey kerd.

Aslanî da zanayene ke sûryanîyê ke serran verî pê zorî dîyabî koçkerdene, êdî hêdî agêrenê erdê xo ser la raştê gefan yenê. Aslanî dîyar kerd ke Gevrîye Akguç seba ke erdê pîrikanê xo nêda qoricîyan bîya hedef û vat: ''Herême de tay kesê sey qoricîyan est ê ke sûryanîyan ra aciz ê. Nê cergê dewlete peyê menfaetanê xo yê rant, pere û destekî de yê. Xîret yeno kerdene ke herême sûryanîyan ra bêra xalîkerdene.''

Goerge Aslanî bale ante ser ke sûryanîyî hetê cerganê dewlete ra sey tehlukeyê vera menfaetanê înan yenê dîyenê û vat: ''Eke cînayetê Hurmuze Dîrîlî ser de biameyêne vindertene Gevrîye Akguç do nêameyêne kiştene. Dewaya Hurmuz Dîrîlî de mehkeme xîret kerd ke dosya mîyan bikera. Coka nê pirsî yenê vîrê merdimî; gelo kiştoxî nêzdî û wezîfedarê dewlete yê? Ma dewaya serê kişîyayîşê Gevrîye Akguç teqîb kenê. Eke na dewa de muhakemekerdişêko zelal nêro kerdene hînî ma do vajê ke cînayet hetê erkdaranê dewlete ra ameyo kerdene.''