Endama Konseya Serekîye ya Pêroyî ya KCK’yî Sozdar Avesta beşdarê bernameyê Rojeva Welatî yê Stêrk TV’yî bi û cewab da persanê derheheqê rojdemî yê rojnamegere Mehtap Orake.

Avesta qedexeyê pêvînayîşê keyeyanê Îmraliyî sey leteyêkê konseptê neweyî hesibna û va: ‘‘Îmarali de dewlete polîtîkayêka cîya rayra bena. Nê talîmatî hetê Erdoganî ra yenê dayene. Mesele qedexe ya zî zeman nêyo. Rayberê ma 20 serrîyo binê tecrîd de yo. No tecrîd û tewir vera vindertişê Rayberîye û xoverdayîşê şarê Kurdî yo. Wa naye hol bizanê ke mesele tena Îmrali de yena çareserkerdene. Rayberîye ard ziwan ke o semedê çareserîye amade yo û dewlete sucî ser tepişt. Înan vatêne ê haştîye wazenê la dimayê vengdayîşê Rayberîye cade pêvînayîşî qedînayî û qedexe vist dewre. Dewlete reyna vera şarê Kurdî qerarê înkar û çînkerdişî girewt. No zî nîyetê înan o raşt ramojneno. Ma zanê ke nê caardişî feyde nêkenê. Ê do mecbûr bimanê û reyna Îmraliyî zîyaret bikerê.‘‘

Avesta polîtîya hêrişkare ya vera cinîyan û şaran vist vîrî û nê vatî: ‘‘Erdogan bi îşkence û zulmî nêeşka şarî bitersno. Cimatê Tirkîya hînî nêeşkeno rejîmê neweyî rê tehemul bikero. Îqtîdar heq û huqûq ra qerfîyayo.Tena bi tersî wazeno îqtîdarê xo bipawo. Erdogan seke îqîtdar de yo heq huqûq nêmend. No rejîm wina nêeşkeno dewam bikero, do çîn bibo. Sandiq de derbeya girde werde. Bi zulmî wextê derg keno la peynîya îqtîdarî nêzdîya.‘‘

Avesta xoverdayîşê gerîlayan silam kerd ser va: ‘‘Gerîlayê azadîye tena Başûrê Kurdistanî de mucadele nêkenê. Heme Kurdistan de destkewteyê şarê Kurdî bi xoverdayîşê gerîlayî yenê pawetene. 35 serrî yo gerîlayî bi bedelanê pîlan semedê şarê Kurdî mucadele kenê. Sîstemê Erdogan-Bahçelîyî hetê gerîlayanê azadîye ra ame leqnayene. Textê înan hetê gerîlayan ra ame leqnayene. Coka bi operasyonanê bi nameyanê cîya cîyayan hêrişê gerîlayî kenê. La gerîla heme hêrişanê înan pûç vejeno. Ez reyna fermandarîya Heftanîn û Xalurkê pîroz kena.‘‘

Avesta bale ante hêrişanê vera HDP’yî ser û mayan ra waşt ke wa kayanê dişmenî ra mexapîyê û wina dewam kerd: ‘‘Mayî ganî mîyanê xoverdayîşê raştî de bê.Îqtîdar Amed de kayêk vist dewre. Mayê ke domanê înan gerîla de verê banê HDP’yî de dayê roniştene. Komîteyêka pîya bi MÎT’î xebityena amede kerdo û keyeyan danê arê. Ma çapenîye de dîyî zafê nê keyeyan domanê înan gerîla de zî nêyê. Waştişê înan oyo ke HDP bêro qefilnayene. Ma mayanê xo hol nas kenê. Înan domanê xo yê erjayeyî bi destanê xo nê şorişî rê dîyarî kerdî. Îqtîdar tewr zaf ciwanan û mayanê gerîlayan ra terseno. Hetêk ra qeyûm şaredarîyan de ca kerd, hetî ra zî mayî berdî verê banê HDP’yî. Mayê şervanan mayê ma yê. Dişmen mayan ser kayanê leyşinan kay keno ganî mayî destûr naye medê.‘‘

Endama Konseya Serekîye ya Pêroyî ya KCK’yî Sozdar Avesta vera ablûqaya serê Kampa Mexmûrî razînêbîyayîş ramot, xoverdayîşê Mayanê Mexmûrî silam kerd û qiseykerdişê xo wina qedîna: ‘‘Nê prosesî de ganî heme partîyê Kurdan semedê çareserkerdişê meseleya Kurdî berpirsîyarîya xo bica bîyarê. Semedê ameyox û yewîya Kurdan  ganî hukmatê Başûrî tayî tewiranê xo caverdo. 20 rojî yo Mexmûr de mayî kuçeyan de semedê wedartişê ambargoyî xover danê. Nê mayî heme mayê şahîdan ê. Heta ke nê caardişê werte ra nêrê wedartene yewîya şarê Kurdî do derbe bigero. Ganî çarçeweya yewîya neteweyî de cepheyê demokrasî bêro xurtkerdene. Reyna ciwanê Kurdan ganî seba rijnayîşê faşîzmî verê xo bidê koyanê Kurdistanî.‘‘