Endama Konseya Serekîya Pêroyîye ya KCK’yî Sozdar Avesta derheqê serrgêra 20’ine ya komploya 15’ê Sibate, grevanê vêşanîye yê ke dewam kenê û weçînitişan de ercnayîşî kerdî. Avesta vat, “Dewleta Tirkî bi pêvînayîşê 20 deqeyan ê Rayberê Şarê Kurdî Abdullah Ocalanî waşt kayêk bikero la no kay bi ser nêkewt. Bêguman her xebere yan zî hayîdarîya ke Rayberîye ra yena girewtene seba ma helmêk o. No seba ma muhîm bi la qîm nêkerd ke çalakîyî biqedîyê. Serê çalakîya Leyla Guvene ra 105 rojî ravêrtî. Embazê bînî yê ke grev de yê zî waştişê înan bi heman hawayî yo. Na çalakî newe ya û gamêka tarîxî ya, zaf erjaye û firaz a.”

Avesta derheqê weçînitişanê 31’ê Adare de zî nê vatî: “Nê weçînitişan de ganî çew nêvajo ‘eke ma qezenc bikerê zî garantî çinya ke ê do destê ma ra nêgêrê.’ Ganî bi ruhê Leylayan, Gulistanan, Nasiran, xoverdayoxanê zîndanî, Fadîleyan, Şîyar û Yusûf Îbayan nizdê weçînitişan bibê. Eke wina nizd bibê do serfirazîyêka pile bi dest bifînê.xoverdayoxê grevê vêşanîye xebatanê weçînitişî rê hêzêkê pîlî danê.”  

Endama Konseya Serekîya Pêroyîye ya KCK’yî Sozdar Avesta nê ercnayîşî kerdî:

“Ez embazanê ma yê xoverdayoxan Leyla Guvene, Nasirî, Fadîle, êyê ke zîndanan de yê, yê Strasbourgî, yê Almanya, yê Gallerî, yê Toronto, yê Awusturya û êyê ke Awusturalya de bedenê xo dayê serê mergî û grevê vêşanîye de yê silam kena. Komplo bi ser nêkewte û hemverê îradeyê azadî de do çirey nêeşko bi ser bikewo. 20 serrî yo ke rayberîya ma binê tecrîdêkê giranî de yo. Ma do çirey esaret û tecrîdbîyayîşê ci rê nêmûsê. Seka embaze Vîyane vatibi, ‘Mûsayîş îxanet o.’ Naye ra 20 serrî yo ke hemverê komploye de mucadele dewam keno. Çalakîya Leyla Guvene kewta roja xo ya 105’ine. Embazê bînî yê ke grev de yê zî waştişê înan bi heman hawayî yo. Na çalakî newe ya û gamêka tarîxî ya, zaf erjaye û firaz a.

MA DO CUYA TECRÎDKERDÎ HENDÎ QEBÛL NÊKERÊ

Embazê ma yê zîndan de yê zî grev de yê. Ma zanê ke şert û halê înan hîna giran ê. Xora grev de yê, la rixmê nê înan rê awe û îlacî nênê dayene. Na yewe ra xoverdayîşê zîndanî şertanê hîna giranan de dewam keno. Xoverdayîşê Leyla Guvene kewta menga xo ya 4’ine, Nasir Yagizî 3 mengî xo ra dima verdayî. Tay mendo ke ê zîndanan zî bibo 3 mengî. No zî ramojneno ke proses merheleyêka newî de yo. Embazê ke grev de yê, şarê Kurdistanî û Têgêrayîşê Azadîye komploye ra û tecrîdê Îmraliyî ra vat “bes” o. Ma do cuya tecrîdkerdî qebûl nêkerê.

Hêzanê mîyanneteweyîyan seba menfaatanê xo komploye de ca girewt. Rayberîye ê wextî têgêrayîşê ma rê krîtîkê hemrayîya kemîye kerd. 20 serrî yo ke ma seba ke hemrayîya kemîye biqedînê cehd kenê. Gama ke Rayberîya bêro azadkerdene, fikiranê xo bi hawayêkê azadî cimatî dir pare bikero a game ma do bieşkê vajê hemrayîya kemîya wedarîyaya.

PÊVÎNAYÎŞO 20 DEQEYÎ KAYÊK BI

Ma 15’ê Sibate xo ra dima verda. Bi 20 serrî. Bi çalakîyan ame vatene ke ‘Ma hendî nê qebûl nêkenê, ganî serra 21’ine de azadîya Rayberîye bica bêro û îşxalbîyayîşê Kurdistanî biqedîyo.’ Naye ra ez çalakîya xoverdayoxanê ke grev de yê sey çalakîya seserra 21’ine name kena. Ewro êyê ke cuya demokratîk û azade rê serkêşîye kenê cinî û ciwan ê. Embaze Leyla bi mesuldarîye dest bi xoverdayîsî kerd. Dormeyê na çalakîye de cimatêko pîl ame pêser. Dewleta Tirkî seba şikitişê xoverdayîsî birayê Rayberîye şirawit Îmrali, la no kay bi ser nêkewt.

Rayber Apo tepişteyêko alelade nêyo. Rayberê şarêk o ke esîr ameyo girewtene. Rojakewtena mîyanêne de çareserî destê ê de ya. Ganî bi nê hawayî ê rê nizd bibê. Wa ewro qanûnêk nêvejê û meşte seba menfaatanê xo reyna tecrîdî nêfînê dewre. Ganî şeklêko fermî bêro dayene. Eke wina bo do waştişê xoverdayoxan bica bêro. La hawayêko sewbîna bo manayêka ci çinya. Vateyêk esto vanê, ‘Osmanîyan de kayî zaf ê.’ Înan bi ê pêvînayîşê 20 deqeyî waştibi ke xoverdayîşî bişiknê û bi tehlîyekerdişê embaze Leyla waşt ke kayê xo temam bikerê. La embazanê xoverdayoxana vat bedelê ci çi beno wa bibo ma prosesî rê hadre yê. Bi nê hawayî xoverdayîş bi xurt û aver şi. Bawerîya ma bi serfirazîya xoverdayoxan tam a.   

HDP SÎSTEMÊ DEMOKRATÎKÎ Û HEMSEREKÎYE ESAS GÊNO

Weçînitişê 31’ê Adare xeylî muhîm ê. Wa çew nê weçînitişan rê teng nizd nêbo. Wa nêvajê ‘eke ma qezenc bikerê zî garantî çinya ke ê do destê ma ra nêgêrê.’ Tayê cayan de nizdbîyayîşê winayênî estê. Ganî bi ruhê Leylayan, Gulistanan, Nasiran, xoverdayoxanê zîndanî, Fadîleyan, Şîyar û Yusûf Îbayan nizdê weçînitişan bibê. Eke wina nizd bibê do serfirazîyêka pile bi dest bifînê.xoverdayoxê grevê vêşanîye xebatanê weçînitişî rê hêzêkê pîlî danê. HDP û xeylî partîyanê sîyasîyan ê Kurdan tîfaqê xo eşkera kerd. No tîfaq zaf muhîm o. Şima çende dostan dormeyê xo de bîyarê pêser hende şima do faşîzmî bikerê zihîf. Hemverê nê sîstemê faşîstî de HDP, sîstemê demokratîkî û hemserekîye esas gêno.

Nê weçînitişan de xusûsen cayê ke qeyûmî estê zaf muhîm ê. Ganî qeyûmî nê bajaran ra bêrê eştene. Ganî şaredarîyanê ke 2014 de ameybî qezenckerdene ra hîna vêşî şaredarîyî bêrê qezenckerdene.

8’Ê ADARE DE GANÎ CINÎYÎ BI RUHÊ LEYLAYAN VEJÎYÊ MEYDANAN

Hendî çîyo ke ci ra bêro tersayene yan zî astengî nêmendî. Her çî seba bi destfînayîşê serfirazîye yo. Naye ra ma veng danê; qij, pîl û ciwanî, her kes dewan de, mehlayan de, bajaran de, şaristanan de xo organize bikero, sindoqan rê wayîr vejîyo. Nê prosesî bikero prosesê serewedartişê pîlî. Îradeyêko pîl vejîyayo werte. Ganî dormeyê nê îradeyî de bêrê pêser. Ma kewenê yewna prosesê neweyî. Vernîya ma de 8’ê Adare esto. 15’ê Sibate de serewedartişêkê pîlî dest pêkerd û serkêşîya Leylayan de dewam keno. 8’ê Adare de ganî bireso dereceya tewr berze ke ma bieşkê Newroz de netîceyanê rindan bi dest bifînê. Naye ra prosesêko zaf muhîm o.

Ganî hêzê demokrasîyî, hêzê azadîye, cinîyî, ciwanî, her kes mucadeleyê xo xurt bikero. Hem grevê vêşanîye bêrê xurtkerdene, hem zî xebatê weçînitişî bêrê rayraberdene. Ganî 8’ê Adare de cinîyî bi ruhê Leylayan vejîyê meydanan. Ganî bi adirê zereyê Mazlûman, bi ruhê Leyla û Sarayan Newrozî firaz bikerê. Hewteyê 31’ê Adare senî bi rayberîya qehremanan dest pêkerde, ganî 21’ê Adare ra heta 31’ê Adare bi ruhê qehremanan serfirazîya pile bêro destfînayene. Bendewarî û waştişê ma no yo ke wa her kes bi nê amacê xo bidê nê prosesî ser.