Endama Konseya Serekîya Pêroyî ya KCKyî Sozdare Avesta rojbîyayîşê Rayberê Şarê Kurdî Abdullah Ocalanî û qewimîyayîşê Şingalî ANFyî rê ercnayî.

Avesta sere de rojbîyayîşê Abdullah Ocalanî bimbarek kerd û vat: ''8ê Adare û Newroz de bi milîyonan kesê ke vejîyayî meydanan semedê azadîya fîzîkîye ya Rayber Apoyî îradeyê xo ramojna. Ma bi wesîleya na roja bimana reyna soz danê ke ma do semedê azadîya fîzîkîye ya Rayber Apoyî têkoşînî hîna xorî û pîlêr bikerê. Na çareçewa de ez veng dana heme cinî, ciwan û şarê ma û hêzanê demokratîkan ke wa dahîna aktîf tewrê nê prosesî bibê. Ez bi wesîleya na roje Rayber Apoyî selam û hurmetanê xo yê tewr bimanayan şawena  û semedê pîlkerdişê paradîgma veng dana. Reyna şexsê hemrayan Mustafa û Mahsumî yê ke 2009 gama ke şîyênî Amara hêrişê faşîstan de şehîd bîyî, heme şehîdanê ma bi hurmet yad kena.''

Avesta Mam Şemo (Şemdîn Baran) û fermandaranê YBŞyî ra Xidir Hebabî înan ke cuya xo vînî kerde, yad kerdî û keyeyanê înan rê serweşîye waşte.

Sozdare Avesta derheqê qewimîyayîşanê Şingalî de nê vatî: ''Pêkerdişê 9ê teşrîna verêne ya Baxdad û hukmatê PDKyî ke bi destê dewleta tirke ameye amadekerdene planê qirkerdişê êzidîyan o. 6 serrî yo şarê ma welat û teberê ci de vera fermanê êzidîyan payan ser o.  Rixmê nayî hukmatê Iraqî semedê çareserî gamêke nêeşte. Ma zanê ê binê zextê de yê. Bitaybetî dewleta tirke ya faşîste înan tehdît kena. Reyna PDK zî israr keno. Wa hukmatê Iraqî hole bizano ke waştişê dewleta tirke û PDKyî semedê karê înan nîyo.

Heta nika êzîdîyan zirarêk nêdayo hukmat û şarê Iraqî. Hukmatê Iraqî êzidîyan rê deyndar o. Seba ke 3ê tebexe ya 2014î de verê hêrişê DAÎŞî akerd û şarê êzidî bê pawitişî verda û remayî hukmatê Iraqî û PDK bîyî sebebê mergê bi des hezaran kesan. Ma nê vengdayîşî tim kenê ez reyna vajî.  Ganî nê tewir û dişmenîye caverdî. Wa hînî îradeyê êzidîyan bêro naskerdene, hurmet bêro ramojnayene û statuyê Şingalî bêro naskerdene. Êzdiyî zirar kesêk nêdanê la eke înan rê hêriş bêro kerdene  ê do heta peynî cewab bidê.''

Avesta wina dewam kerd: ''Metodê çareserî yo terw demokratîk meclîsî reyde muzakere yo. Xora no goreyê qanûnê bingeyî yê Iraqî yo. Senî ke no qanûn Duhok, Hewlêr û Silêmanî de  yeno caardene semedê Şingalî zî wa wina bibo.  Şarê êzidîyan raştê 73 fermanan ame. Ewro ra tepîya bawerîya înan çewî/e ra çîn a. Wazenê bi îrade û îdareyê xo bibê û xo bipawê. Hukmatê Iraqî ganî na raştîye bivîno û goreyê ci têbigêro. Ganî hinî PDK êzidîyan hedef nêkero. Wa paştî medê hêzanê ke wazenê Şingalî çîn bikerê.''

Avesta bale ante xoverdayîşê Şingalî ser û vat: ''Şingal de her hetî ra dezgeh û kesayetî bi eşkerayîyan vanê ke ê do xo bipawê. Ez semedê nê tewirê înan ê bimana înan selam kena. Şarê ma hînî rayîrê heqîqatî zano. Ganî nê rayîr de têkoşîn bêro pîlkerdene. Têna xoverdayîşê şarê Şingalî nêvejeno ganî heme êzidîyî paştî bidê înan. Her cayê dinya de wa çalakîye zengînî bêrê kerdene. Bitaybetî seferberîya xopawitişî ya ke Şingla de dîyaye destpêkerdene wa bêro pîlkerdene.

Reyna ciwanê Êzidxanî wayîrê Asayîşê Êzidxanî vejîyenê. Nê muhîmê. Êzidîyîye estbîyayîş, xopawitiş û bi kulturê xo ciwîyayîş o. Êzidîyîye semedê pawitişê anor, herre û nasnameyê xo têkoşînkerdiş o. Wextê hêrişê DAÎŞî de heme cayê bimbarekî raştê hêrişî ameyî. Têna Kubbeyê Şerefedînî mend o zî hetê mîlîtananê azadîye ra ame pawitene. êyê ke wayîrê Şingalî nêvejîyenê nêeşkenê vajê ma êzidî yê. Bi na wesîle ez reyna veng dana Mala Mîra, Meclîsê Ruhanî û Babaşêxî. Ê wayîrê anor û prensîban ê. Şarê êzidî hurmet rajoneno înan. Ganî ê rolê xo bîyarê ca.

Avesta veng da şarê Şingal û Kurîstanî ke  Ewropa de ciwîyenê û vat: ''Îmkanê înan hîna zaf ê. Ê zî meydanan de bi çalakîyan cîya cîyayan wayîrê Şingalî vejîyenê. Ez înan selam kena. Ê eşkenê hîna zaf çalakîyan bikerê. Wa serê sibayî ra heta şanî verê Neteweyanê Yewbîyayeyan û Konseya Ewropa û heme dezgehanê mîyanneteweyî de vengê xo bidê eşnawitene. ''

Avesta qiseykerdişê xo wina qedîna: ''Înanê ke pêkerdişê teşrîna verêne kerd heta 1ê nîsane wext dayo. Nê tarîx de hêzê ma Şingal ra vejîyayîbî. Pê nayî wazenê mesaj bidê. Xora nê şar nê têgêrayîş nayî qebul nêkeno. Wa şarê ma pê xo bawer bo. Şingalî hînî rayîrê azadîye dîyo. Keda Rojawanî zî semedê nê komelî esta. Şarê Başûrî ke zaf tengayî antî ganî verê nê qewimîyayîşan bêveng memano. Nika ma aşma nîsane de yê na aşme semedê êzidîyan bimbarek a. Çarşambayê Bimbarekî de ganî xoverdayîş bêro pîlkerdene.''