Endama Konseya Serekîya Pêroyî ya KCKyî Sozdar Avesta bernameyê Rojeva Welat ê Stêrk TVyî de rojdem ercna.

Qiseykerdişê Sozdar Avesta ra beşêk wina yo:
''Ez şexsa embaze Zîlane de pêro şehîdanê Kurdîstanî yad kena. Embaze Zîlane tarîê ma de seke Rayber Apoyî vatbi sey xetêke vejîyaye werte. Embaze Zîlan cinîyî tarîtîye ra vetî û vistî mîyanê merdimîye. Rayber Apoyî cinîyî na xeta têkoşînî de ca kerdî. Çalakîya embaze Zîlane verê suîkastê vera Rayber Apoyî girewt. Cayê çalakîye aye zî zaf girîng bi. Cayê çalakîye de ke nika tede statuyê Seyîd Rizayî esto, merasîmê leşkeran estbi. Dêrsim pê nameyê 'Tuncelî' amebi îşxalkerdene. Coka çalakîya embaze Zîlane zaf manadar a. Na çalakîye seba gerîlayan bi taktîkêko newe. Pê na çalakîye seba cinîyan dewrêkê neweyî dest pêkerd. Cinîyan dî ke ê çita key biwazê do eşkenê bivisnê destî. Nê pêro sayê Rayber Apoyî yê.

Heta ke tecrîd dewam bikero hêrişî zî do dewam bikerê

Vera Rayber Apoyî tecrîdêko giran yeno kerdene, ma nêeşkenê ci ra xeberêke bigêrê. AKPyî no prosesê janê Korona zî xo rê kerd firsend. Ganî vera nê tecrîdî pê metodê Zîlane têkoşîn bêro kerdene. Ma reyna dormeyê Rayberîye de bêrê pêser, têkoşîn û xoverdayîş pîl bikerê. Ma zanenê ke heta ke Îmrali de tecrîd dewam bikero hêrişî zî do dewam bikerê. 

Kiştoxê embaz Helmetî ameyî cezakerdene

Ez embazanê ma Kasim Engîn û Dîyar Xerîb (Helmet) bi rêzdarî û heskerdişî yad kena. Ma seba ke vîrameyîşê înan bidê ciwîyayene têkoşîn kenê. Embaz Helmet pê tewir, zanayîş û tewrbîyayîşê xo sey yew fîlozof bi. Şehadetê ci ra dima ciwanê kurdî zaf hêrs bîyî û tewrê Têgêrayîşê ma bîyî. Şehadetê embaz Helmetî de barê MÎTê Hewlêrî estbi. La ciwananê kurdan mengêke ra dima nameyê Helmetî ser o çalakîyêke kerde û qesasê ci girewt. Sûcdarî peynîya peyêne de do bêrê cezakerdene.  Coka çalakîya vera MÎTî meşrû bîye. Embazê ke na çalakîye kerde nika zîndanî de xo ver danê, ci rê cezaya îdamî ameya dayene. Ez înan rê selam kena û xoverdayîşê înan rê serkewtiş wazena. Wayîrvejîyayîşê şehîdan her tim bi hamleyêke. 

Embaz Helmet kedêka pîle daye ke Başûrê Kurdîstanî de îşxal biqedo. Cewabo tewr xurt ê serrgêra şehadetê Helmetî ganî çi bibo? Teqez ma ganî verê îşxalê dewleta tirke bigêrê. Ma do qesasê embaz Kasim û Helmetî bigêrê. Ê wurdî zî teqîbkerdoxê xeta Zîlane bîyî. 

Têgêrayîşê ma DAÎŞ bin kerd

Dewleta tirke serra 2015î ra nata hêrişê pêro Kurdîstanî kena. Wa kes xo nêxapno. Dewlete her tim vera ma şer kerdêne la 2015î ra nata pêro hêzê xo vera ma seferber kerdî. Nê hêrişî dewamê hêrişanê vera Girê Sipî, Efrîn, Serêkanî yê. Erdoganî qesasê DAÎŞî ma ra gêno. Kamî Rojhelatê Mîyanênî de DAÎŞ çin kerd? Têgêrayîşê ma. Başûrê Kurdîstanî de zî têgêrayîşê ma mudaxeleyê DAÎŞî kerd. 

Erdogan seba pêro kurdan tehluke yo heta o vîrusê Korona ra zêdêr bitehluke yo. Hêrişê vera Şêladizê, Delalokî û Kobanê de sivîlî kişîyayî. 2 reyî hêrişê Rojhelatê Mîyanênî kerd. Erdogan vera vano 'Ez hêrişê PKKyî kena.' ê pê paştdayîşê NATO û hêzanê mîyanneteweyîyan û binê çimdarîya Rûsya de  nê hêrişî kenê. Heta nika nê hêzan vera hêrişan vengê xo nêvetî. Dewleta tirke hêrişê cinîyan, hêrişê xoverdayoxan kena. Wezîrê Karanê Teberî Çavuşogluyî vat 'PKK partîya cinîyan a, hetê cinîyan ra îdare beno.' PKK û şarê Kurdîstanî pê naye sereberz ê. Hêrişê vera embaze Zehra, Hebûn, dayîke Aqîde, Hevrîne, Amara dewamê hêrişê vera Sara, Rojbîne û Ronahî yê. Nê armanc kenê ke cinîyê kurdan verê înan de çok şorê erdî ro.

Dewlete bêvengîya Herêma Kurdîstanî ra cesaret gêna û hêriş kena

Dewleta tirke bêvengîya Hukmatê Herêma Kurdîstanî ra cesaret gêna û hêriş kena. Nêçîrvan Barzanîyî derheqê hêrişanê dewleta tirke de çîyêk nêvat la seba PKKyî vatêne wa Başûrî ra vejîyo. Ganî Hukmatê Başûrî nê tewirî ra fek vera bido. Nêverdeno şar zî nêrazîbîyayîşê xo bimojno. Erdogan wazeno bikero ke kurdî bidê yewbînan ro. Têgêrayîşê ma vera nê kayan vejîyeno, seba naye têkoşîn keno. 

Wa şingalijî  kampan ra abigêrê erdê xo

Şarê Şingalî Başûr de kampan de manenê. Şarê Şingalî seba rey û hetkarîya mîyanneteweyîye yeno xebitnayene. Nêwazenê şarê Şingalî abigêro waranê xo. Ganî şingalijî abigêrê erdê xo. Heta ke ê kampan de vêşanî, xizanî û nêweşîye ra bimirê wa şorê erdê xo de pê rûmetê xo biciwîyê.

Rojawan de Ewropa de şarê kurdî vera hêrişan nêrazîbîyayîşê xo mojna. Vakur de zî operasyonê qirkerdişê sîyasîyî dewam kenê. Ê se kenê wa bikerê nêeşkenê zerrîya kurdan ra nasnameyê înan bivejê û çin bikerê. Ganî ma hîna zêde çalakîyê bikerê, astengîyan derbaz bikerê. Têna xoverdayîş û têkoşîn şarê kurdî rê serkewtiş do bîyarê.

Wa her kes wayîrê gerîlayan bivejîyo

Wa her kes dormeyê gerîlayan de bêro têkişt û wayîrê gerîlayan bivejîyo. Ez venga ciwanan dana ke wa verê xo bidê koyan. Ciwanê kurdî, erebî, tirkî kam beno wa bibo ganî ciwanî tewrê gerîlayan bibê. Eke wazenê Erdogano faşîst şoro wa têkoşîn de ca bigêrê.  Her roje no faşîzm zêdîyeno. Her kes têkoşînê gerîlayan vîneno ma do teqez ser bikewê. Wa her kes rengê xo, xeta xo eşkera bikero.

Ajan û notiran rê rayîr medê

Gerîlayî 40 serran ra nata xo ver danê. Şima zî kesanê ke dişmenî reyde hemkarîye kenê, janîye kenê megêrê zereyê xo. Bibê yew û vera nînan bivejîyê. Wayîrvejîyayîşê embaz Helmetî pê berzkerdişê têkoşînî, naskerdişê dişmenî beno. Ez pê na wesîle reyna şezsê embaz Helmet û embaz Kasimî de pêro şehîdanê Kurdîstanî pê rêzdarî yad kena. Ma do sozo ke da înan bîyarê ca. Têkoşînê ma nê esasî ser o dewam bikero û do ser bikewo.''