Avesta vat: “PKK adeta sey meselaya gula ke sî ra vejîyo averşîyayîşêko mûcîzevî yo, destanêkê azadîye yo.” Endama Konseya Serekîya Pêroyîye ya KCKyî Sozdar Avesta derheqê serragêrayîşê 40. yê PKKyî de ANFyî rê qisey kerd.

Sere de ez serragêrayîşê 41. yê partîya ma PKKyî ro Rayber Apo, keyeyanê şehîdanê ma yê qehremanan, xoverayoxanê zîndanan, cinîyanê fedakaran, şerwananê azadîye, heme kadro û mîlîtananê partîya ma, dostan û merdimîya avere pîroz kena.

Heta ewro bedelê pîlî dîyayî, dejê pîlî ancîyayî, la qezencê pîlî zî bi dest kewtî. PKK tenya seba şarê kurdî nê sebe hemeyê merdimîye sey manîfestoyêkê azadî yo. Seba şarê ma nê 40 serrî bi xoverdayîşê hemverê polîtîkaya înkar û qirkerdişî ya dewleta  tirkî ya kolonyalîste vîyart.

PKK, TOXIMÊ AZADÎYE YO KE SÎNEYÊ KURDISTANÎ DE AMEYO KARITENE

Nê 40 serrê ke vîyartî her gama ci bi kede û gonîya merdimanê qehremananê ke bi felsefeya Apoperwere roşin bîyê amî elawitene. Çîyo ke PKKyî Kurdan dir kerdêne yew waştişê serkewtişî û şexsîytê ci bî.    

PKKyî nê 40 serranê peyênan de qîmê xo tenya bi serkêşîya cimatêkê neweyî nêarde, heman wext te bi sebeb ke şarê ma tarîxê xo dir newe ra têkilîya xo virazo. 

ŞAR QEZENC KERD  Û KOMPLOKARANÊ MÎYANNETEWEYÎ VÎNDÎ KERD

Mucadeleyê ma yê azadîye ke bi serkêşîya Rayber Apo û PKKyî aver şina hemeyê dormeyanê komelî de bîyo vila. PKK sey partîyêka sosyalîste vejîyaye, la oyo ke averşîyayîş û xeta ci bewlî kerde felsefeya cuye û şexsîyetê Rayber Apoyî bî.

Bi nê hawayê xo PKK têgêrayîşêko rayberkî yo. Na yewe ra heta ewro rixmê komplo û hêrişanê tasfîyekaran de bi serkewtiş aver şîyo. Wina ke komploya mîyanneteweyîye ya ke şexsê Rayber Apoyî de amî viraştene, şarê ke binê serkêşîya PKKyî de bîyî qezenc kerd û komplokar û kolonyalîstan ê faşîstan ê ke Kurdistan îşxal kerdo zî bin kewtî. 

Nê rojanê serra 41. ya partîya ma de tecrîdo giran ê serê Rayber Apoyî dewam keno. Hemverê nê de sere de hêzê pawitişî yê Efrînî, hemeyê Kurdistanî û teberê welatî de bi şîarê “Berxwedana Serdemê” (Xoverdayîşê Çaxî) mucadeleyêkê xoverdayîşî yo pîl ame dayene û do no mucadele bêvindertiş dewam bikero.

QERARO KE HETÊ AMERÎKA RA GÎRÎYAYO DEWAMÊ KOMPLO YO

Gerîlayanê modernan ê seserra 21. mewzîyê xo pawitî û derbe serê derbeyî de da dişmenî ro. Hemverê nê de dîktatorîya AKP-MHPyî bêçare menda û kewtê mîyanê prosesê tewr zehmetî yê komare. Sere di bi ciwîyayîşê krîzê ekonomîkî hetê sîyasî û eskerîyî ra bîya boçika Rûsya û NATO.

Dişmenî tecrîdê serê Rayber Apoyî kerd giran û bi qanûnan qaşo pîneyan ci rê nana pa. Komploya 15ê Sibate wazena ke bêro dewamkerdene. No qerarê Amerîka yo peyên delîlêkê nê yo. Reaksîyonê şarê ma yê hemverê nê qerarê bêexlaq û bêrûmetî zaf muhîm o.  

VIRAŞTIŞÊ HÊZANÊ XOPAWITIŞÎ DO AMEYOXO KURDISTANÎ DE TAYÎNKERDOX  BO

Her çende xîlafê mabênê hêzanê serdestan ê kapîtalîstan ê globalan û dewletanê herême xorî bibê zî aktorê raştekînî yê vurayîşî do şarê ke bîyê wayîrê îradeyî bibê. Tenya bi mucadele ma eşkenê tarîtîya ke dormeyê welatê ma girewta wedarê û azadîya rayberê ma ya fîzîkkîye bica biyarê.

PKKyî dinya de reya ewilêne bi îlankerdişê artêşbîyayîşê cinî xopawitişê cinî û îradeyê ci vet meydan. Cinîyan serewedartişan de sefanê vernîyan de ca girewt. Cinîya kurde ke xo azadî wa girê dabî zîndanan de bi serkêşîya hemraye Sakîne Canise faşîzmî rê meydan waşt.  

MUCADELEYÊ CINÎYAN Ê KURDAN SEBA ŞARANÊ BINDESTAN BI ÇIMEYÊ ÎLHAMÎ

Cinîya Kurde xusûsen zî şorişê Rojava de û Şengal de bi şer û xoverdayîşê xo yê hemverê çeteyanê DAÎŞî merdimîye ser o tesîrêko xorî kerd. PKKya ke partîyêka cinîyan a serragêrayîşê xo yê 41. de her wextî ra hîna zaf têgêrayîşê azadîya cinî kena xurt.

Ciwanîya Kurdistanî ke bi rûmetêkê pîlî beyraqa azadîye ya mucadeleyê 40 serrî kirişte heme wextan de bi layîqî rolê xo yê serkêşîye bica ard. Ciwanîyêk ke ewro bi serkêşîya Baranan, Mahîran û Axînan de werişta hemleya xo ya SERE WEDARE do bi azadîya Rayber Apoyî neqş bikero.

Serra 41. yê PKKyî de gure û mesuldarîyê pîlî paweyê ma yê. Ganî giranî bidîyo xebatanê yewîya neteweyîye. Ez ancî şehîdanê pîlan ê 40 serre şexsê Delal Amede, Avesta Xabure, Karker, Atakan Mahîr û Mam Zekî Şengalî de bi hurmet bi vîr ana. Soz dana ke ma do beyraqa ke înan ra dewr girota tim asîmanan de bihejnê û hesabê înan bipersê.