Hemserekê Kongreya Komelê Demokratîkî (KCD) Berdan Ozturk, Hemserekê Partîya Herêman ê Demokratîkan (DBP) Salîha Aydenîz û Keskîn Bayindir û yew grûba partijîyan mabênê 3-7ê hezîrane de bi şîarê ''Ma vera faşîzmî xoverdayîşî pîl kenê'' Çewlîg de zîyaretî kerdî. Heyeto ke programê ci yê Çewlîgî qedîya do Colemêrg de xebatanê xo rê dewam bikero.

Hemsereka Pêroyî ya DBPyî Salîha Aydenîz programê Çewlîgî ercna. Aydenîze vist vîrî ke înan xeylêk bajaran de pêvînayîşî kerdî û tewr peynî de zî şîyî Dêrsim û Çewlgî. Aydenîze  ard ziwan ke înan derheqê tecrîdê serê Rayberê Şarê Kurdî Abdullah Ocalanî, meseleya kurdî, zextê welatî, qeyûm û qirkerdişê vera cinîyan de qisey kerd û vat: ''Ma zîyaretanê xo de dî ke rixmê heme zext, qirkerdiş, tecrîd  û polîtîkayanê qeyûmî yê rejîmî şarê kurdî têkoşînê azadîye de ziwan, kultur û waştişê xo îdarekerdişî canêverdayo.''

Aydenîze ard ziwan ke dewlete pîya bi sîyasetmedaran heme komelî rê zulum kena û wina dewam kerd: ''Ma zaf zelal dî ke xozaya Kurdîstanî senî binê nameyê operasyonna de yena texrîpkerdene. Îqtîdar senî wazeno faşîzmî bikero mende û dişmenîya kurdan û cinîyan keno. Îqtîdar dişmenîya kurdan ra hêrişê Rojawan û Başûrê Kurdîstanî keno. Her ca de ame vatene ke muxatabê çareserî Birêz Abdullah Ocalan o.''

Salîha Aydenîz wina dewam kerd: ''Kurdî roja ke herra ci ameye çar letekerdene ra nata tim wayîrê erd û kulturê xo vejîyenê û wazenê ke xo bi xo îdare bikerê. Îqtîdar zî tim vera kurdan eynî metodî şuxulneno. Ewro Rojawan û Başûr de vengkerdişê dewan, koçbarîya bizore, bombardumankerdişê dewan û qetilkerdişê ke kiştoxî yenê nimitene estê. Îqtîdar bi metodanê seserran semedê şerî kerdo xo çeng ke têkoşînê azadîye tesfîye bikero. Şarê ma zî nayî zaf hole zano. Îqtîdar bê şîdet û zextî semedê şarî çîyêk nêkeno. Ma pê tecrubeyanê yo 7ê hezîrane yê serkewtişê Kobanê û vîjnayîşê 29ê adare zanê ke faşîzm senî yeno binfînayene. Şarê kurdî têkoşînê înşkerdişê demokrasîyî dano.''