Parlamentera HDP’yî Salîha Aydenîze dîyar kerd ke hemkarîya Tirkîya û DAÎŞî êdî nêeşkena bêra nimitene û destnîşan kerd ke herêma ke serçeteyê DAÎŞî Bexdadî tede ameyo kîştene na têkilî û hemkarîye fînena verê çiman.

Parlamentera HDP’yî Salîha Aydenîze derheqê galanê îşxalkerîye yê Dewleta Tirkan ê vera Vakur û Rojhêlatê Surîye de ANF rê qisey kerd û na mijare nirxnaye. Salîha Aydenîze dîyar kerd ke galê dagirkerîye û proseso ke bi weçînitişê 7’ê Hezîrane dest pê kerdo ganî yewbînan ra cîya mêrê nirxnayene û vat: “Demo ke şerî dest pêkerd Kurdê Rojawanî û şarê ke herême de yê teberê rejîmî û çeteyan de xeta hîrêyine de tewgerayî. O taw ra bîyo yew modeleko ke bîyo hêvî afirna.  Sergêra komploya mîyanneteweyî ya 9’ê Teşrîna Verêne de êrîşan dest pêkerd. Êrişî  bi hemkarîya Dewleta Tirkan û dewletanê hegemonîkî yê ke verpirsîyarê komploya mîyanneteweyî ya vera modelê cuya hempare ya  Kurdan amey kerdene.”

‘Hemkarîya Tirkîya û DAÎŞ’î Êdî Yena Zanitene‘

Aydenîze dîyar kerd ke organîzasyono ke Dewleta Tirkîya sey “Artêşa Mîllî ya Sûrîya’ pênase kena, çeteyê DAÎŞî, EL Nusra û eyê ke înan ra vêşî mende ra ameyê were û nînan tena  ‘kincê’ xo vurenayê. Aydenîze vat: “Tirkîya çîyo ke DAÎŞî nêeşka Rojawan de bikero nika bi hemkarîya doçikê DAÎŞî kena ke bi ser bifîyo. No galkerdiş dewamê zîhnîyetê Îttîhat û Terakkî yo, xo spirneno dişmenîya kurdan û vera kurdan her tewir dişmenîye keno. Hemkarîya DAÎŞî û Tirkîya verê çimanê pêro dinya de ya. Bereyê DAÎŞî Ebûbekir El Bexdadî herêma ke 5 kîlometre dûrê sînorê Tirkîya ya û binê kontrolê Tirkîya de ya de ame kîştene û na yewe hemkarîya di hetan eşkera kena. Tirkîya wazena ke bi her rayîr û metodî na mintiqa îşxal bikera û Kurdan ra bikera veng. Xora no armancê xo zî bi rengekê eşkerayî pêro dinya rê beyan kerd.”

‘Eke Kurdî Bibê Yew Do Ser Bikewê‘

Aydenîze vera galan bal anit girîngîya yewîya neteweyî ser û vat: “Na rewşa ke êrîşî yenê kerdene de ganî ma Kobanê newe ra bîyarîme xo vîrî. Aya ke tîya de ma fîştîme ser yewîya neteweyî ya Kurdan bîye. Kurdan heqê xo yê ke fîştê dest pêro dinya rê beyan kerdî. Eke kurdî nika bibê yew û her qadî de bi rengekê hemparî tewbigerê do statu, ziwan û kulturê xo bifîyê xo dest. Kurdî bi xoverdayîş û bedelanê xo dinya de ca girewt. Aya girînge yewîya neteweyî ya.