Wekîla Partîya Çep a Keske ya Dêrsimî Aytene Kordu derheqê Peymana Lozanî û tecrîdê vera Rayberê Şarê Kurdî Abdullah Ocalanî de Jinnewsî rê qisey kerd. 

Wekîle Aytene Kordu vist vîrî ke 1923 de pê Peymana Lozanî kurdî ameybî înkarkerdene û Kurdîstan amebi parçekerdene. 

Aytene Kordu pare kerd ke seserra diyîne ya Lozanî de hema zî kurdî seba heqanê xo têkoşîn kenê û vat: ''Nika her parçeyê Kurdîstanî de têkoşîn est o. Ma Vakur de xeta Rayîrê Hîrêyînî de bi perspektîfê neteweya demokratîke têkoşîn kenê. Ma Tirkîya û Vakurê Kurdîstanî de seba ke estbîyayîşê kurdan bipawîyo têgêrenê.  Ma sey elewîyan, cinîyan ê kurdan û şarê kurdî qetî Peymana Lozanî û polîtîkayanê ci yê înkar û îmha nêşinasnenê.''

Aytene Kordu bale ante ser ke şexsê Abdullah Ocalanî de şarê Rojhelatê Mîyanênî û Mezopotamya û cinîyî yenê tecrîdkerdene û vat: ''Polîtîkaya tecrîdî seba ke paradîgmaya Ocalanî bêra astengkerdene yena caardene. A raşte hêrişê vera Rojawanî zî seba ke tede na paradîgma yena caardene qewimîyenê. Ma sey cinîyan û şaran vera tecrîdî bi felsefeya xo têkoşîn kenê. Ewro tecrîd vera her kesî yeno caardene. La ne tecrîd ne zî polîtîkayê bînî nêeşkenê verê têkoşînê ma bigêrê. Ma do kerdişanê antî-demokratîkan tim teşhîr bikerê û bi nê hawayî têkoşînê xo aver berê.'' 

 Aytene  Kordu îfade kerd ke hînî yew meşrûtîyetê Peymana Lozanî nêmendo û vat: ''Ewro îqtîdarê AKP-MHPyî hêrişê her fikrî keno, waranê cuye binê tecrîdî de xeniqneno û xoza talan keno. Mîsal îqtîdar mefhûmanê sey 'tecrîd' û 'rêxistine' terseno  û verê şarî de dêsanê tersî virazeno. Ma vera ney xo rêxistin kenê. Na komare komarêka demokratîke nîya; komara netewedewlete ya. Verê na komara antîdemokratîke de alternatîfê ma sîstemo konfederal o. Ganî ma vera pêro hêrişan yew xeta têkoşînî awan bikerê. Coka ma verê xo danê Rayîrê 3. Sîsmtemo nikayên verê waştişanê şarî de cewabêkî nêdano. Eke ma rêxistinîya xo bi xoserî awan bikerê eşkenê cewabê Peymana Lozanî zî bidê. Ma do bi nê fikran kongreya xo bikerê.''

Aytene Kordu peynîya qiseykerdişê xo de ard ziwan ke ewro kurdî ganî hîna zaf giranîye bidê yewîya neteweyîye ser û vat: ''Polîtîkayanê şerî û talanê xoza ra ciwanê ma şinê Ewropa, ê bînî zî raştê polîtîkayanê şerê taybetî yenê. Faşîzm bi hawayêkê lezî û rêxistinkerdeyî ho yeno. Biewnê HUDA-PAR Meclîs de yo. Hetê bînî ra bi destê PDKyî zî tay çîyî qewimîyenê. Vera nê kerdişan ganî ma yewîya xo awan bikerê.  Cinîyan ê kurdan çend reyî seba yewîye xîret kerd. Nika zî xebatanê yewîya neteweyîye de ganî cinîyî serkêşîye bikerê.  Meseleya canêardişê yewîye netîceyanê Lozanî ra yew bi. Ganî na babete ser o ma dîplomasî bikerê û xebatanê komelkîyan aver berê.''