Vervatoxa Meclîsê Cinîyan ê HDPyî Ayşe Acar Başaran merkezê partî de kombîyayîşê çapmenîye kerd.

Başarane bale ante tecrîdê Îmraliyî ser û vat: ''Seke zanîyeno 14ê adare de tay îdîayî weşanîyayî. Nê îdîayî bîyî sebebê qesawetî ke bingeyê xo sîstemê tecrîdî ra gêno. Tecrîd Îmrali de dest pêkerd û pêro welatî ra vila bi.''
Başarane vist vîrî ke 113 rojî yo zîndanan de grevê vêşanîye dewam keno û vat: ''Ma reyna venga îqtîdarî danê ke wa mesuldarîya xo bîyaro ca. Ma tira rîca nêkenê. Heqê Ocalanî yo ke sey tepişteyanê bînan avûkat û keyeyê xo bivîno. Wa cade ey reyde pêvînayîş bêro kerdene.''

Başarane derheqê Newroze de vat: ''Ma pê coşê 8ê Adare Newroze pêşwazî kenê. Vera nê hêrişan, vera Planê Çinkerdişî, vera sîyasetê tecrîdî ma do emser zêdêr bi coşî, pê qerardarîyêka pîlêre û xurtêre biba. Ma do pê na qerardarî waranê Newroze de bibê. Newroze sey her wextî ma rê  roja xoverdayîş û geşkerdişê têkoşînî ya.

Peynîya qiseykerdişê xo de Başarane venga kurdan da û vat: ''Bêrê ma pîya Newroze de vengê azadîye berz bikerê.''