Başûrê Kurdîstanî de nuştox û rojnamegeran vera mudaxeleyê azadîya îfade û hêrişan Federasyonê Rojnamegeran û Nuştoxanê Xoseran awan kerd. Federasyonî vizêr Silêmanî de bi kombîyayîşêkê çapemenîye ronîyayîşê xo îlan kerd.

Federasyonî da zanayene ke ê do pêro parçeyanê Kurdîstanî de xebatanê xo bikerê û ê do vera astengkerdişê çapemenîya azade, azadîya îfade û fikran têkoşîn bikerê.

Federasyonî eşkerayîya îlankerdişî de armancê xo wina rêz kerdî:

''-Ma do vera pêro astengkerdişê serê azadîya îfade û fikran têkoşîn bikerê.

-Ma do vera pêro qanûn û krîteranê serê azadîya fikran vejîyê.

-Ma do vera hêriş û binpaykerdişê serê nuştox, medya û rojnamegeran tewir bigêrê.

-Ma do seba azadîya nuştiş û têkilîviraştişî warêkî awan bikerê.

-Ma do rêxistinanê mîyanneteweyîyan reyde bixebitê û meseleyanê xo nînan de pare bikerê.''