Bi hezaran serran o Baxçeyê Hewselî yê Amedî gan danê dormeyê xo. Hetêkê Hewselî de Çemê Dîcle hetê bînî de qezaya Sûrî esta. Baxçeyê Hewselî her wisar de pê renganê cîyan xemilîyenê.

Hecî Sularo ke 66 serran o Hewsel de citkarîye keno bîyo parçeyêkê xoza. Sular Hewsel de bîyo pîl û wextêk qet Hewselî ra nêvejîyayo. Hargûşan ra bigêre heta bize, kerg, hinge, masê Sular zaf heywanan weye keno.

Sular vano o nêeşkeno Hewselî ra ber cayêk de biciwîyo û wina dewam keno: ''Wextêk neçarîye ra ez şaristan de menda. O çax mi de zaf nêweşîyî peyda bîyî. Ez agêraya nêagêraya nêweşîyê mi qedîyayî têna şeker mi de esto.''

Sularo visneno vîrî ke wextêk Baxçeyê Hewselî depoyê sebzeyan ê Amedî bi û vat: ''Baçeyê Hewselî 2015 de kewtî lîsteya mîradê dinya yê UNESCOyî. Verî ma debara xo têna pê citkarîye kerdêne la nika masrafê ci zaf ê. Citkarîye bîye zehmet. Nika sebzeyê ma pere nêkenê. Şarê ma hînî şino sebzeyanê îthalan gêno. Ne sebzeyî weşîya merdimî rê xirab ê.''

Sular pare keno ke talanê dewlete ê kerdî mexdûrî û vano: ''Dima ke qezaya Sûrî ameye xerakerdene hem bazarê berhemanê ma vila bi hem zî banê înan xera bîyî. Verî ma berhemê xo arê dayêne Sûr de rotêne. Nika cayêk nêmendo ke ma tede çîyêk biroşê. Înan eşt taxanê ma dest na bananê ma. Nika zî pê mîlyonan cayê ma roşenê.''