Hemserekê Konseya Rayberdişî ya KCKyî Cemîl Bayikî bi beşdarê bernameyê Stêrk TVyî. Beşê diyînî yê qiseykerdişê Bayikî wina yo:

''Gerîlayî 40 serran ra nata vera polîtîkaya qirkerdişî ya dewleta tirke têkoşîn kenê. Gerîlayî xo ver danê. Pêro destkewteyê şarê kurdî sayê şehîdan ra ameyî destvistene. Dewleta tirke polîtîkayêka şerê taybetî ana ca. Vera vana 'Ma hê gerîlayan qedînenê, ma ê qedînayî, siba ma do biqedînê.' Bi nê hawayî wazena ke îradeyê şarê kurdî bişikna, welatê kurdan bikera welatê tirkan. Gerîlayî, YPS, HBDH vera na polîtîkaya gemarine têkoşînêkê tarîxîyî anê ca. Ez înan fîraz kena, înan rê selam kena. Kurdîstan de kulturê xoverdayîşî awan bi. Gerîlayê HPG, YPS û HBDHyî nê kulturî temsîl kenê. Eke gerîlayî çinêbê Kurdîstan de çîyêk nêno destvistene. Gerîlayî tim erjanê kurdan pawenê.

Îqtîdarê AKP-MHPyî seba ke rewşa xirabe ra bixeliso vîrusê Korona sey firsendêk dî. Seba weşîya şarî înan çîyêk nêkerd la seba terefgîranê xo kerd. Ê xîret kenê ke îqtîdarê xo bipawê. Îqtîdarî maske û cîhazî nêşawitî Kurdîstan. Kurdîstan de verê vîrusî akerd. Çunke ê vera kurdan polîtîkaya qirkerdişî anê ca. Seba ney zî vîrusî ra îstîfade kenê û nîyetê xo yê seba ney zî nênimnenê. Ganî şarê ma nê îqtîdarî ra çîyêk nêpawo, xo muxtacê înan nêkero. Coka ganî şarê ma îmkananê xo yewbînan reyde pare bikero, paştî bido yewbînan.

Dewlete dest na şaredarîyan ser, seba ke kiştoxan, tecawuzkeran, cergan vera bida qanûnêk vet û nê kesî zî Wezaretê Karanê Zereyî de ca kerdî ke seba qirkerdişanê xo bixebitna. Pê nê kesan dewlete do hêrişê kurdan û hêzanê demokrasîyî bikera. Nê qanûnî ra dima hêrişî zêdîyayî. Dewlete hêrişê goran, şaredarîyan û muxalîfan kena. Verê cû zî Antalya de cenazayê gerîlayan dayî kutikan. Cîzre de Sîlopî de dewlete merdimî kiştî ke cenazayê înan bi rojan werteyê kuçeyî de mendî. Na dewlete, no îqtîdar wina yê. Ganî her kes vera nê hêrişan xo rêxistin bikero, têkoşîn bikero. Îqtîdar zaf bîyo qels, keno ke bikewo. Ganî şarê kurdî û hêzê demokrasîyî nê çinbîyayîşî bikerê temam. Wext wextê têkoşînî yo, pîlkerdişê têkoşînî yo.

Îqtîdar qirkerdişê kurdan zêdîna. Cenazeyî, gorî seba merdiman ercîyaye yê, fîraz ê. Gorê Seyîd Rizayî, Şêx Seîdî ça de yê, gorê înan estê? Nika zî dewlete hêrişê goran kena. Dewleta tirke pê hêrişanê vera goran qesasê xo gêna, hêrişê erjanê kurdan kena. Gorî vîr, hîşmendî û ruhê kurdan ê. Dinya de rengê ci senî bena wa biba qet yew îqtîdar hêrişê goran nêkeno. Têna tirkî hêrişê goran kenê. No zî raştîya înan, karakterê înan mojneno, mojneno ke yew eleqeyê înan pê îslamîyet û merdimîye çin o. Kesê ke xo rê vanê musluman ganî vera nê hêrişan de vinderê. Tay dadîyê ma verê goran de nobete gênê. Beno ke tay kesî seba ke nêwazê nê zulmî biancê waştişê dewleta tirke anê ca. La no raşt nîyo. Ganî şarê ma nuşteyê goran nêwedaro û wayîrê goran bivejîyo. Şarê ma deyndarê şehîdan o.

Pêro dinya zanena ke DAÎŞ binê fermanê dewleta tirke de yo. Tirkîya cerganê DAÎŞî şawena Lîbya, Sûrîye, Yemen. Na dewlete bîya belaya sereyê dinya. Wexto ke kurdî sînor de bîyî dewleta faşîste qebul nêkerd la çewî DAÎŞî rê çîyêk nêvano. Na polîtîkayêka bêexlaq a. Ez tîya ra venga şarê erebî dana ke dewleta tirke binê nameyê Îslamîyetî de ciwananê erebî visnena mîyanê şerî, ganî şarê erebî ney qebul nêkero.

Kurdê Mexmûrî seba kurdan xizmet kerd, şehîdî dayî. PDK senî eşkeno nê prosesê vîrusê Korona de vera Mexmûrî ambargo ano ca? No kerdiş kurdan rê xizmet nêkeno. Na polîtîkaya PDKyî ya vera Mexmûrî şerm a. Dewleta tirke wazena ke Kampa Mexmûrî îmha bikera. Tirkîya seba menfaatanê xo ney kena la çira PDK bingeyê na îmha seba Tirkîya amade keno? Na polîtîka xizmetê kamî kena? Nameyê kurdayetîye, dewlete û merdimîye ser o na polîtîka nêna caardene. Coka ez venga PDKyî dana ke hînî nê şermî ra xo zî kurdan zî bixelisno. Pêro dinya persena ke PDK senî nê ambargo ano ca. Dinya vana ganî kurdî vera kurdan ganî na polîtîka nêarê ca. No seba PDK zî hol nîyo. Ganî PDK prosesê vîrusê Korona ra îstîfade bikero û nê şermî ra xo bixelisno.''