Hemserekê Konseya Rayberdişî ya KCKyî Cemîl Bayikî bi vîdeoyî mesajêk erşawit û Newroze fîraz kerde.

Mesaj wina yo:

''Nameyê Hemserekatîya Konseya Rayberdişî ya KCKyî ser o ez şima pêroyînan selam kena. Ez Newroza Rayber Apoyî, şarê ma yê çar parçeyanê Kurdîstanî, Kampa Mexmûrî, Şingalî, Lavrio û yê xoverdayoxanê zîndanan, gerîlayan fîraz kena. Şexsê Mazlûm Doganî de ez şehîdanê Newroze, ê Garê bi rêzdarî yad kena. Sozo ke ma dabi şehîdanê demokrasî û azadîye dibare kena.

Seke zanîyeno Rojhelatê Mîyanênî de Şerê Dinya yo 3. qewimîyeno. Nê şerî de kurdan xeylêk netîcetî girewtî. Hem xo rêxistin kerd hem zî erjê neweyî afernayî. Dewleta tirke ya faşîste dî ke eke a verê kurdan nêgêra kurdî do  warê azadîye û demokrasî de xeylêk hemleyanê xurtan bîyarê ca, peynîya  modernîteya kapîtalîste, dewletanê îşxalkeran û qirkeran bîyarê.

Coka dewleta tirke vera kurdan dest pê hêrişan kerd û nê hêrişî hema zî dewam kenê. Nê hêrişî hêrişanê Dehaqî ra giranêr ê. Îqtîdarê AKP-MHPyî yo faşîst wazeno pê nê hêrişan kurdan qir bikero.

Dewleta tirke ya faşîste dişmena şaranê Rojhelatê Mîyanênî û demokrasî ya. Coka wext wextê berzkerdişê ruhê Newroze yo. Dehaqî kurd û şaranê Rojhelatê Mîyanênî rê zulm kerdêne. Kawayo asînkar vera Dehaqî werişt payan ser û adirê Newroze geş kerd. Serewedaritişê Kawayî ra dima Dehaqo zulmkar bin kewt û seba şaranê Rojhelatê Mîyanênî dewrêkê neweyî dest pêkerd. Nê çaxî de AKP-MHP Dehaqê zalimî temsîl kenê. Sey Kawayê asînkaro ke adirê azadîye tavist û sey Kawayê Modernî Mazlum Doganî  ganî merdimî vera faşîzmî têbigêrê, têkoşînê demokrasî û azadîye xurtêr bikerê. Şarê ma ra waştişê ma yo; ça de benê wa bibê ganî waranê Newroze de bêrê pêser û ruhê Newroze berz bikerê.

Seke Rayber Apoyî vat: 'Şarê kurdî şarê Newroze yo.' Coka mesuldarîyê şarê kurdî estê. Kurdî ganî seke ruhê Newroze aferna nê mesuldarîyan bîyarê ca. Nika başa her kesî têkoşînê azadîye û demokrasî yê kurdan de yê. No seba kurdan şerefêko pîl o. Ma pê nê şerefî ciwîyenê.

Ma çend mengî verî Hemleya 'Wext wextê azadîye yo' daye destpêkerdene. Armancê ma caardişê azadîya Rayberîye, Kurdîstan û Rojhelatê Mîyanênî yo. Coka ma do Newroza 2021î de bingeyê azadîya Rayber Apoyî û Kurdîstanî de têkoşîn bikerê û derbazê safhayêka bîne bibê.

Seba caardişê azadîya Rayber Apo û şarê ma îmkanê ma estê. Pê nê firsendî, pê berzkerdişê têkoşînî ma eşkenê netîce bigêrê. Kurdî benê xurtêr, dişmenê kurdan benê qelsêr. Ma senî ke tarîx de Dehaq bin kerd reyna eşkenê  wina têkoşîn bikerê.

8ê Adare de cinîyan ê kurdan karêko pîl kerd. Cinîyê kurdî tim rayberê kurdan ê. Pêrı Newroz û serewedaritişan de ê vernî de yê. Têkoşînê demokrasî û azadîye yê cinîyan ê kurdan  xeta azadîya cinîyan de yeno kerdene û pêro dinya de veng vet. Cinîyê dinya cinîyan ê kurdan sey rayberê xo vînenê. 

Eke ewro dinya de cinîyî, ciwanî, sosyalîstî vera faşîzmî xo ver danê, hêzê azadî û demokrasî kurdan û cinîyan ê kurdan xo rê esas gênê no netîceyêka têkoşînê cinîyan ê kurdan o. Cinîyê kurdî na hemle de zî rolê xo bi xurtî do bîyarê ca.

Dewleta tirke ya îşxalkere hêrişê Garê kerdbi û waştbi ke derbêka pîle bida qerargehê têgêrayîşê ma. Gerîlayan û şehîdanê Garê vera nê hêrişan bi xurtî xo ver da û derbê pîlî dayî dişmenî ro. Ganî ma nê tewirê şehîdanê Garê tim xo rê esas bikerê. 

Eke ma Newroze xo rê bikerê esas, bingeyê ci ser o têkoşîn bikerê ma do bieşkê netîceyanê pîlan bivisnê destî. Tarîx de senî Kawayê asînkerî adirê Newroze gir kerd, pê nê adirî kurdan û Rojhelatê Mîyanênî de peynîya Dehaqî arde, şehîdanê Garê zî bi nê hawayî no adir Garê de gir kerd. Ganî ma pê nê ruhî vejîyê meydanan. Ruhê Newroze îşxalkerî, koladerî û zulm qebul nêkeno. Ma do nê esasî ser o ver bi azadîye şorê û heta azadîye dewam bikerê, ser bikewê. Biciwîyo ruhê Newroze, Roşanê Newroze, Biciwîyo Serek Apo, biciwîyo têkoşînê ma yê demokrasî û azadîye. Ez her kesî rê serkewtiş wazena û reyna Roşanê Newroze fîraz kena.''