Endamê Konseya Rayberdişî ya KCK’yî Cemîl Bayikî Radyoyê Dengê Welatî rê qisey kerd. Bayiko ke tewrê bernameyê dilistanî bi bale ante serê rastîya Rayberê Şarê Kurdî Abdullah Ocalanî û PKK’yî. Bayikî ard ziwan ke PKK xo demokratîkbîyayîşê Kurdistan, Tirkîya û Rojakewtena Mîyanêne ra mesuldar vîneno û vat, “Rayber Apoyî serê nê esasî ra îdeolojî û felsefe aver berdî. Sere de tesîrê reel sosyalîzmî estbi. Rayber Apoyî tim vernîya xo dîyêne. Cigêrayêne. Dî ke sosyalîzmo reel nêeşkeno netîce bigîro.

Dîmayo ke ê no dî îdeolojîya xo, felsefe û paradîgmaya xo viraştî. Dîmayê perçebîyayîşê Sovyetan dî ke paradîgmaya ci rast a. Na rastîye ser o îdeolojî, sîyaset û xet û metodê xo yê mucadeleyî aver berdî. Vatêne ke yew vurayîş lazim o. Ê wextî de nê ercnayîşê ê ra dima tayê partîyanê ke hetgêrê Sovyetan bîyî bi vateyê ‘nê hemverê Sosyalîzmî de yê’ hêrişê ma kerd. Vejîya werte ke sosyalîzm no nêbi. Dîmayo ke ê nê dî paradîgmaya xo hîna aver berde û sosyalîzm û merdimîye rê xizmetêko hîna pîl kerd. Sosyalîzmî demokrasî û seypêyîye bica ardî. Roje bi roje no hal hîna rind yeno famkerdene.”

MA YEW MANÎFESTO HADRE KENÊ

Bayikî dewamê qiseykerdişê xo de bale ante serê rol û mîsyonê PKK’yî zî û vat, “Verî Marx, Engels, Lenîn û înanê bînan ra ameyêne pawitene ke sosyalîzmî aver berê, înan ra umîd ameyêne kerdene û naye ser Enternasyonalo 1‘in, Enternasyonalo 2’yin û Enternasyonalo 3’yin ame viraştene. Bi nê enternasyonalan têgêrayîşo sosyalîst xurt bi. Nika zî kesê demokrat û sosyalîstî bi umîdêkê winayênî ewnênê PKK û rayber Apoyî ra.

Vanê wa PKK û rayber Apo gamêka winayêne bierzê. Xusûsen cinîyî nê wazenê. Çunke rayberîye seba cinîyan xebatêka pîle kerde. Ganî ewro zî PKK nê umîdan rê wayîr vejîyo. Naye ra PKK’yî bi kede û bedelanê pîlan mucadele aver berd. Seba merdimîye destkewteyê ci virazîyayî û ganî nînan rê wayîr bivejîyo. Têgêrayîşê ma zî nê esasan ser o aver şino. Ganî ma nê esasan ser o organîzebîyayîşî aver berê. Çunke faşîzm nika krîzîkê zaf pîlî ciwîyeno. Naye ra ganî hemverê modernîteya kapîtalîste de modernîteya demokratîke bêro averberdene.”

BI ŞERÊ PSÎKOLOJÎKÎ NÊEŞKENÊ NETÎCE BIGÊRÊ

Bayik vateyê Mûrat Karayilanî yê “Hadreyîyê ma dewam kenê, ma do Kurdistan de paşta dişmenî bişiknê. ” ser o zî vindert û vat, “Ê senî wazenê PKK’yî tasfîye bikerê, wazenê Kurdan qir bikerê, PKK zî vernîya nê gêno. Seba nê mucadele dano. Umîdê şarî gerîla yo. Eke gerîla derbe biwero dişmen bawer keno ke do netîce bigêro. Hêzanê modernîteya kapîtalîste dimayê perçebîyayîşê Sovyetan waşt ke umîdê hêzanê sosyalîstan raşte ra wedarîyo.

La gerîla ê wextan ra heta nika tim bîyo hêzê azadîye. Dimayê rijîyayîşê sosyalîzmê reelî ra înan waşt ke gerîlayî zî tasfîye bikerê. Nika dinya de oyo ke sosyalîzmî temsîl keno hêzê gerîlayî yo ke hetê rayber Apoyî ra Kurdistan de ameyo awankerdene. Naye ra hêzanê kapîtalîstan paştdarîya teknîkîye daye dewleta Tirkî. Waşt ke şarê Kurdî û şaranê Rojakewtena Mîyanêne bêumîd verdê. Gerîla zî hemverê nê de taktîkan virazeno û umîdî şarî keno xurt.

Wa xo nêxapênê. Ê çîrey nêeşkenê gerîla û PKK’yî tasfîye bikerê. Sey verî nêeşkenê şarê Kurdî bikerê kole. Kurdî hendî bê azadîye çîyêna qebûl nêkenê. Şarê Kurdî sifirî ra dest pêkerd û ame nê rojan. Çinêbîyayîşî ra nê îmkanî vetî meydan. Verî çew dostê Kurdan nêbî, ewro xeylî dostê înan estê. Bi felsefe û îdeolojîya ke destê Kurdan de ya çew nêeşkeno vernîya Kurdan û PKK’yî bigêero. Naye ra do wesîteyê şerê psîkolojîkî netîce nêgêrê. Vurayîşo ke gerîla xo zere de ciwîyeno bewlî yo xora.”  

DEWLETE WAZENA BI ZULM Û ÎŞKENCEYÎ VERNÎYA ÇALAKÎYAN BIGÊRO

Bayikî qiseykerdişê xo de bale ante serê xoverdayîşê Zapî û nê vatî: “Zap zaf muhîm o, tarîx de cayê ci cîya yo. La seba ma tena Zap de nê tarîxê PKK’yî de xeylî destanî estê. Ewro bi serkêşîya Leyla Guvene, Nasir Yagiz, embazan ê zîndanan û bi serkêşîya embazanê bînan no destan yeno ciwîyayene. Naye ra dormeyê çalakwanan de xoverdayîş hîna beno hîra. No destan zî do meşte bibo bingeyê destanêkê hîna pîlî, na rastîya têgêrayîşî ya.

Ganî embazanê ke zîndanan de yê reyde hîna zaf bikewê têkilîye mîyan. Eşkenê telefonê zîndanan bîkerê, şirê verê berê zîndanan, rayraşîyayîşan bikerê û çalakîyan virazê. Ganî keyeyî zî nêvinderê. Çîyo ke înan ra yeno waştene no yo ke ganî domananê xo rê wayîr vejîyê. Eke nê keyeyî wayîr vejîyê hûmara înan taye nêya, bi hezaran a. Dewlete nêeşkena vernîya înan bigîro, çunke hûmara înan xeylî vêşî ya. Ganî bi cesaret û qerardarîye tê bigêrê.

Embazê ke zîndanan de yê na çalakîye seba xo nêkenê. Seba şarê Kurdistanî, azadîye û merdimîye kenê. Eyê ke teber de yê şertê înan hîna rind ê. Rayber Apo Îmrali de mîyanê xoverdayîşêkê pîlî de yo. Madem êyê ke zîndanan de yê seba înanê teberî xover danê, ganî êyê ke teber de yê zî înan rê hîna zaf wayîr vejîyê. Na babete de kemasîyî estê û ganî raste ra bêrê wedartene. Dewlete zaf zihîf a, zaf tersena. Wazena ke bi zulm û îşkenceyî vernîya çalakîyan bigêro.”

EKE ŞAR PÎYA TÊ BIGÊRO, NE POLÎS, NE LEŞKER NE ZÎ MÎT EŞKENO VERNÎYA ŞARÎ BIGÊRO

Bayikî ard vîrî ke tayê çalakîyanê paştdarîya grevê vêşanîye de ge-ge tayê parlamenterî tena çalakîye virazenê û vat, “Gama ke wina beno dişmen hêriş keno. Ê parlamenter û îradeyê şarî yê, ganî şar înan rê wayîr vejîyo. Înan reyde rayra şiro. Eke pîya rayra şirê ê nêeşkenê hêriş bikerê. Hêriş bikerê zî nêeşkenê netîce bigêrê. La cayêkê sey Amedî de 100 kes rayra şino, helbet do hêriş bikerê. Nîmeyê Amedî hurzo ê do ro cayêk ke xo binimnê bigêrê. Ganî şarê man ê bikero.

Cîzrespor seba futbolî şi Antalya, înan hêriş kerd. Hêrişê Amedsporî kenê. Yanî derheqê Kurdan de çi esto wazenê ke raste ra wedarê. Vanê yan şima do teslîm bibê, yan zî ma do şima nêdê ciwînayene. Kurdî bişeref û bianor ê. Ganî şarê ma zî vajo ‘Tecrîdê hemverê rayber Apoyî, îşkenceyo ke zîndanan de yo biqedîyo.’ Nê bi eşkerayî vajo û seba nê çi bedel lazim o bido. A game do na dewleta Tirkî ya faşîste mecbûr bimano ke game bierzo. Eke wina nêbo a do peynîya polîtîkayanê qirkerdişî nêaro.”

MA DEWLETA TIRKÎ XEYLÎ RIND NAS KENÊ

Bayikî vat, “Ma dewleta Tirkî xeylî rind nas kenê. Gama êyê hemverê xo zihîf bivîno serê ci de şina. La eke bivîno ke xurt û qerardar o game peyde erzena. Verî zîndanan de grevê vêşanîye bi ser kewtî û înan Rayberîye dir pêvînayîş viraşt. No bi xoverdayîşî bi. Tarîx de zî gama ma ewnênê embaz Mazlûm, Hayrî û Kemalî hemverê înan de xover da. Netîce se bi? Esat Oktayî rê bi mezel. Yanî tim xoverdayîş bi ser keweno.”

Endamê Konseya Rayberdişî ya KCK’yî Cemîl Bayikî peynîya qiseykerdişê xo de nê vatî: “Heta hemverê rayberîye de tecrîd bibo, Tirkîya de çirey edalet, demokrasî û azadîye nêna ca. Na yewe ra hedefê tecrîdî de demokrasî, azadîye û qezencê Kurdan estê. Heta tecrîd dewam bikero do no sîyaset zî dewam bikero. Naye ra ganî tecrîd bêro şikitene. Tecrîd bişikîyo do faşîzm birijîyo, demokrasî û azadîye bêro. Ma do nê zulmî ra zî bixelisîyê. Ma her roje şehîd danê. Beno ke ma na çalakîye de zî şehîd bidê. Wa her kes hesas bo û bê ke reaksîyon ramojno nizd bibo.

Ganî çew hîsdar û bireaksîyon nizd nêbo. Nika ma bi hawayêkê bicesaretî mucadeleyê xo domnenê. Teber de, teberê welatî de, zîndanan de ça beno wa bibo her kesî rê ruh dano. Ma do bi mucadeleyî destkewteyanê xo bipawê. Leyla Guvene verê heminan no fam kerd û her kes dorê aye de ame pêser. Ez her kesî silam kena, serkewtiş wazena, ma do bi ser bikewê.”