Hemserekê Konseya Rayberdişî ya KCKyî Cemîl Bayikî Stêrk TVyî de cewab da persan û xoverdayîşê gerîlayan, têkilîya hêrişanê îşxalî ya bi hêzanê globalan, qirkerdişê zîndanan, kampanyayê seba azadîya Rayberê Şarê Kurdî Abdullah Ocalanî ercnayî.

Bayikî verî 1ê Gulane Roşanê Karkeran fîraz kerd û venga pêro kurdan da ke tewrê çalakîyanê 1ê Gulane bibê.

Qiseykerdişê Bayikî ra beşêk wina yo:

''Wextêkê dergî ra nata têgêrayîşê ma û şarê ma rê konseptê çinkerdiş û qirkerdişî yeno ferzkerdene. Goreyê nê konseptî dewlete reyna hêrişê Zap û Avaşînî kerd. Nê konseptî de mîsyonêk dîyayo PDK û dewleta tirke. Ê zî ney anê ca. Wayîrê Komployê Mîyanneteweyî nê konseptî anê ca, NATO paştî dano nê konseptî, Amerîka, Almanya û Îngilîstan mîyanê nê konseptî de ca gênê. Ê hol zanenê ke heta  ke Rayber Apoyî, PKK û gerîlayan bêtesîr nêkerê nêeşkenê qirkerdişê kurdan temam bikerê. Coka hedefê înan PKK yo.

Hedefê înan de Rojhelato Mîyanên zî est o. Şerê vera Zap û Avaşînî şerêko hîra yo. Nê şerî de ê wazenê verî tîya, dima zî Başûr bivisnê destî. Ê xîret kenê ke pêro Vakur, Rojawan û Başûrî û pêro Rojhelatê Mîyanênî bigêrê binê hegemonyaya xo. PKK vera ney têkoşîn keno.

Nê hêrişî xizmetê modernîteya kapîtalîste kenê coka hêzê mîyanneteweyî vera nînan vengê xo nêkenê. Amerîka, Almanya, Îngilîstan û NATO senî ke vera hêrişanê Vakur, Rojawan û Başûrî bêveng ê wina vera hemkarîya PDK û dewleta tirke zî bêveng manenê. Çunke a raşte ê nê sîyasetî teorî de anê ca, PDK û Tirkîya zî pratîk de anê ca.

Şerê Ukrayna-Rûsya ra sebeb nika nê hêzî wazenê gazî Rojhelatê Mîyanênî ra berê Ewropa. Na xeta gazê tabîyî zî Kurdîstanî ra derbaz bena. Seba ke na xete bivisnê destî wazenê PKK werte ra wedarnê. La hesabê înan şaş o.

Sîstemî dî ke ê nêeşkenê bi destekê Tirkîya vera PKKyî netîce bigêrê. Coka înan vera kurdan de reyna kurdî nayî ro. Ê pêro îmkananê xo seba tasfîyeya PKKyî hêrişê ma kenê. Bi taybetî wa şarê ma yê Başûrî ney hol fam bikero. Nika statuyê Başûrî binê tehlukeyî de yo. Ganî şarê erebî zî nê tehlukeyan bivîno û hîna zaf nêrazîbîyayîşê xo bimojno dewleta tirke û PDKyî.

Artêşa Iraqî wextê hêrişanê vera Zap û Avaşînî de hêrişê Şingalî kerd. Hukmatê Kazimîyî waşt ke nê hêrişan xo rê bivurnê firsendêk û êzidîyan ra tay tawîzan bigêro. Êzidîyî vera DAÎŞî şer kerdbi, rûmetê PDK û hukmatê Iraqî pawitbî. Herinda ke PDK û Iraq waştişanê êzidîyan qebul bikerê hêrişê înan kenê. Ganî Iraq bi dîyalogan êzidîyan reyde meseleyanê xo çare bikero. No sîyasetê Iraqî do reyna zerar bido ey. Êzidîyî têna wazenê bi azadî biciwîyê.

Mi mesajê xo yê Newroze de vatbi ke PDKyî dewleta tirke weçînaya kurdan ney. Nika her kes na raştîye vîneno. PDK menfaatanê kurdan nê menfaatanê keyeyê xo paweno. PDK hetê Amerîka, Îngilîstan, Almanya û Îsraîlî de ca gêno. PDK her hetî ra cayê dewleta tirke de tewrê nê şerî bîyo. PDK keno ke leşkerê tirkî debikewê waranê gerîlayan, destekê lojîstîk dano artêşa tirke, kişteyan arê dano û îstîxbarat dano. Yanî xûlasa PDK xizmetê dewleta tirke keno. Şarê kurdî her ca de bi xurtî vera hêrişanê îşxalî û PDKyî têgêreno. Nê tewirê şarî de rolê gerîlayan dîyarker bi. Ganî PDK nê tewirê xo yê xayînî war verdo. No sîyasetê dewleta tirke peynî de do PDKyî çin bikero. Eke PKK hedefo yewin o, ê bînî zî hedefo diyîn o.

Kurdîstan de senî ke xeta xoverdayîşî est a, xeta xayînîye zî est a. Ewro pêro kurdî têkoşînê PKKyî zî, hemkarîya PDKyî zî vînenê û vera ney tewirê xo mojnenê. La no qîm nêkeno. Destpêkê hêrişan de nêrazîbîyayîşî zaf nêbîyî dima zêdîyayî. Gerîlayî hê derban danê artêşa tirke ro û no zî peynîya dewleta tirke ano. Coka şarî pê gerîlayan bawer kenê. Ney ra pey hîna zaf kesî do paştî bidê ma. Têkoşînê ma meşrû û heqdar o. Hêrişê dewleta tirke meşrû nîyê. Dewleta tirke wazena welatê ma îşxal bikera. Erkê her kesî yo ke vera ney bigêro. Coka şarê ma, cinîyî û ciwanî ça de benê wa bibê vera hêrişan tewirê xo bimojnê.

Gerîlayê HPG û YJA-Starî mîyanê şertanê zehmetînan de hê destanan nusenê. Ê hêzê xo Rayber Apoyî ra, felsefe û îdeolojîya ey ra gênê. Gerîlayî vera teknîkê tewr averî, bombardumananê giranan xo ver danê. Ê zaf reyî raştê hêrişanê kîmyewîyan zî yenê. Dewleta tirke pê îmkananê NATOyî hêrişê ma keno. Şerê ma vera NATOyî yo. Wayîrvejîyayîşê gerîlayan wayîrvejîyayîşê xo yo. Gerîlayî seba xo çîyêkî nêwazenê, seba erd û şarê xo wazenê.

Ewro şarê Başûrî ra holêr çew hêrişanê kîmyewîyan nêşinasneno. Coka tewr verî wa şarê Başûrî wayîrê gerîlayan vejîyo. Eke PDK û dewleta tirke nê şerî de ser bikewê Başûr do çin bibo. Coka ganî partî, hêz, şar û têgêrayîşê Başûrî tewirê xo bimojnê. Eke Zap de dewleta tirke birijîya, Anqara de zî îqtîdarê AKP-MHPyî do birijîyo. PKK seba ney têkoşîn keno. Coka ganî her kes hetê nê têkoşînî de ca bigêro.

Ganî pêro merdimî tewrê kampanyaya azadîya Rayber Apoyî bibê. Çunke azadîya Rayberîye do meseleya kurdan zî çareser bikera û demokrasîya dinya rê xizmet bikera. Ganî kurdî serkêşîya nê kampanyayan bikerê. Caardişê azadîya Rayber Apoyî erkê pêro kurdan û merdiman o. Çunke Rayber Apoyî têna seba kurdan nê seba pêro merdiman têkoşîn kerdêne. Ewro şexsê Rayber Apoyî de yeno waştene ke hêvîya kurdan, PKK û merdimîye bêra çinkerdene. Dewlete polîtîkaya vera Rayberîye Zap û Avaşîn de zî ana ca. Na polîtîka polîtîkaya qirkerdişî ya. Ê seba ke Rayber Apoyî qirkerdişê kurdan vindarnayo, tira qesasê xo gênê.

Dewleta tirke ewro zîndanan de zî na polîtîkaya qirkerdişî ana ca. Çunke dewleta tirke wazena şarê kurdî bikera şarê tirkî, Kurdîstanî bikera Tirkîya. Coka hêrişê zîndanan kena. Zulmo ke dewleta tirke zîndanan de kena, hetêkê bînî yê dinya de nêameyo dîyene. Ewro kamî seba kurdan û Kurdîstanî têkoşîn kerdo zîndanan de yo. Dewlete zîndanan ra mesaj dana kurdan. Vana 'Eke şima nêwazenê zîndan de bimirê, îşkence bivînê na dewa war verdê.' Ewro zîndanan de îdam yeno caardene, cenazayê tepişteyan goreyê usulî nênê definkerdnee. Nê polîtîkayê wehşîyî do nêeşkê îradeyê tepişteyan bişiknê.

Senî ke dewlete Zap û Avaşîn de wexto ke ser nêkewte dest eşt çeka kîmyewîye, zîndanan de zî qanûnê poşmanîye ard. Seba ke no qanûn zî ser nêkewt, dewlete tepişteyan qetil kena. Ewro tepişteyî bi ruhê Newroze û Rayber Apoyî xo ver danê. Sey gerîlayan tepişteyî zî do ser bikewê.

Hemkarê Tirkîya PDK, Amerîka, Îngilîstan, Almanya, Îsraîl û NATO wa bizanê ke ê se kenê wa bikerê la nêeşkê îradeyê gerîlayan, tepişteyan û şarê kurdî bişiknê. Hêrişê înan hêrsê PKKyî zêdînenê û no hêrs do bibo peynîya înan. Ma bedelanê giranan danê. Verî zî ma dabî û siba zî ma do bidê. La peynî de ê do bin bikewê, şarê kurdî do ser bikewo. Bi nê hawayî zî her kes do ser bikewo.''