Hemserekê Konseya Rayberdişî ya KCKyî Cemîl Bayikî tewrê 'Bernameyê Taybetî' yê Stêrk TVyî bi û rojdem ercna. Beşê destpêkerdişî yê bernameyî de Bayikî rewşa weşîya Rayberê Şarê Kurdî Abdullah Ocalanî, Roşanê Newroze û Xoverdayîşê Garê ser o qisey kerd.

Qiseykerdişê Hemserekê Konseya Rayberdişî ya KCKyî Cemîl Bayikî ra beşêk wina yo:

''Îmrali de her hele şerêko psîkolojîk yeno kerdene. Rayber Apoyî kurdê azadî adernayî, cuya azade pawite coka yeno hedefkerdene.Derheqê Rayber Apoyî de babete se bena wa biba ma rê girîng a. Seba ma cidî ya. Çunke na dewlete Kurdîstan de sîyasetê qirkerdişî ana ca.

Na dewleta qirkere eşkena vera Rayber Apoyî her çi bikera. Coka kurdîstanijî, dostê ma û têgêrayîşê ma bi hawayêkê cidîyî nêzdîyê îdîayanê serê weşîya Rayber Apoyî benê. Tirkîya reyde hêzê mîyanneteweyî-komplogerî zî sîstemê Îmraliyî ra mesuldar ê. Konseya Ewropa, CPT, Amerîkai Îngilîsran û Îsraîl nê sîyasetê qirkerî ra mesuldar ê.

Şarê ma sîyasetê vera Rayber Apoyî qebul nêkeno. Xora NEwroze de kurdan bi zelalî no ard ziwan. Seba qedînayîşê tecrîdê vera Rayberîye û caardişê azadîya ci ganî têkoşîn bêro xurtkerdene.

Çalakîyan ra dima dewleta tirke neçare mende ke destûrê pêvînayîşî bida. Nê pêro taktîk ê, dewlete şerê psîkolojîkî û taybetî ana ca. Nika zî ê vanê ke Rayber Apoyî pê telefonî qisey kerdo. La nînan telefon birna. Şarê ma azadîya Rayber Apoyî ra ber çîyêk qebul nêkeno. Dewlete zanena Rayberê ma seba şarê ma yeno çi mana. Dinya zî o sey Rayberê xo vîneno. Coka vera sîyasetê qirkerdişî merdimî vejîyenê meydanan û wayîrê Rayberîye vejîyenê.

Newroze de kurdî bi xurtî wayîrê Rayberîye vejîyayî û pare kerd ke ê azadîya Rayberîye ra ber çîyêk qebul nêkenê. Ney de israr weş o la ganî hetêkî ra çalakîyî zî dewam bikerê. Ganî ma tewirê Newroze pîl bikerê.

Têgêrayîşê ma dest pê Hemleya 'Wext wextê azadîye yo' kerd. 8ê Adare, Garê, Newroze gamê girîngî yê na hemle bîyî. Nika ra pey zî ganî na hemle bêra xurtkerdene.

Newroze de di mesajê girîngî dîyayî: azadîya Rayber Apoyî û xoverdayîşê vera hêrişanê dewleta tirke. Şarê ma dibare kerd ke ê do hêrişanê dewleta tirke, sîyasetê qirkerdişî yê vera Kurdîstan û Rayberîye qebul nêkerê.

Newroze de vera kurdanê xayînanê ke dewleta tirke reyde vera PKK û Rayberîye têgêrenê mesaj dîya. Şarê ma vera nînan û hêzanê mîyanneteweyîyan vat: 'Rayber Apo û PKKyî ra ber çareserîye çin a.'

Newroze xora roşanê şaran o la a raşte tewr zaf roşanê kurdan o. Tay mendbi ke kurdî nê roşnî xo vîr a bikerê. Rayber Apoyî no dî. Destananê kurdan de zî nusîyeno ke Kawayê Asînkarî vera zulmê Dehaqî  şaran reyde îtîfaq kerd û şar kerd azad. Rayber Apoyî tarîxê şarê ma xo rê kerd esas û Newroze kerde gandar.

Rayber Apoyî pê ruhê Newroze PKK awan kerd. Mazlûm Dogan, Zekiye Alkan, Rahşan; Berîvan, Ronahî, Sema, Navdar, Serhat, Sînan, Şiyar û xeylêk embazanê bînan  ruhê Newroze kerd pîlêr, roja newroze kerde roja xoverdayîşî. Kurdan Newroze de îsbat kerd ke hînî ê neteweyêk ê û ê do parçe nêbê.

Tirkîya de qanûno mende yê îqtîdaran tim dişmenîya vera kurdan bîye. Êyê ke îqtîdarîye de ser nêkewenê caade destê xo erzenê dişmenîya vera kurdan.

Nika çend dadî, keyeyî pê zorî verê bînaya Amedî de ameyî roşnayene. Nînan ra gef yeno wendene û yeno vatene ke 'vajê HDPyî domanê ma remnayê berdê koyan. Eke wina bikerê ma do pere bidê şima, kar bidê şima.'

Reyna keyeyanê şehîdan, gerîlayan û tepişteyan rê ajanîye yena ferzkerdene û seba ke ajanîye bikerê nînan rê gef yeno wendene. Leşker, polîs, karmendê dewlete vera kêna û cinîyanê kurdan şuxilîyenê. Ê zî cinîyan ê kurdan rê bêexlaqîye, fuhuş ferz kenê.

Dezgehê kurdan qefilîyenê, koyê Kurdîstanî dîyenê bombayan ver. Dewlete vana 'ya şima teslîm benê ya zî ma şima çin kenê.' Dewlete dest nana mal û mulkanê kurdan ser. Nasnameyê kurdan nêno qebulkerdene. Dewlete wazena pêro kurdan werte ra wedara.

Şarê ma vera nê polîtîkayan xo ver dano. Newroze de ma no dî. Kurdan pêro dinya rê mesaj da ke 'Şima nêeşkenê ma teslîm bigêrê, ma cuyêka koledarî qetî qebul nêkenê. Ma do Rayberîya xo reyde bi hawayêkê azadî biciwîyê.

Dewleta tirke Garê de xîret kerd ke planêkê pîlî bîyara ca û PKKyî rê derbêka pîle bida. La înan Garê de derbêka pîle werde û neçare mende ke vajê 'Ma Garê de bin kewtî.' Înan waşt mesuldarîya nê binkewtişî bikerê milê muxalefetî. Muxalefet reya verêne vera îqtîdarî vejîya. Destanê Garê na netîce viste destî. Xoverdayîşê Garê şarê ma, şaranê Tirkîya, parçeyanê bînan ê Kurdîstanî rê tesîr kerd.

Xoverdayîşê Garê propagandaya dewleta tirke ya 'Ma hende gerîlayî kiştê, peynîya PKKyî arde ûsn' çin kerde, bin kerde. Xoverdayîşê Garê de her kesî hêzê Rayber Apo û PKK dî. Her kesî rîyo zûrayîn ê dewlete dî.

Bi taybetî mîyanê sîyasetê Başûrî de vera tirkan tersêk estbî. Xoverdayîşê Garê no ters zî şikna. Xoverdayîşê Garê, 8ê Adare, Newroze pêro şarê ma yê Başûrî rê zaf tesîr kerd.Vakur de kes pê propagandaya dewlete nêxapîyeno. Dewlete dî ke Rayber Apo, şar û gerîlayî girê dayîyê yewbînan ê.

Tay hêzanê mîyanneteweyîyan vatêne 'ma seba kurdan têkilîya xo bi AKPyî xera nêkerê. Alternatîfê AKPyî çin o.' La nînan 8ê Adare, Newroze û Garê de dî ke alternatîf esto.Ê do hînî nêeşkê sey verî nêzdîyê kurdan bibê. Şarê ma Newroze de mesajêko zelal da.

Xoverdayîşê Garê dewrêko newe da destpêkerdene. Reyna eşkera bi ke gerîlayî nêbê demokrasî û azadî zî nêbenê. Çunke gerîlayî hêzê demokrasî û azadî yê. Garê de no dîya.

Bi taybetî hêzanê demokrasî û azadîye yê Tirkîya dî ke no têkoşîn bê Rayber Apo, PKK û şarê kurdî nêbeno. Rayber Apo, kurdan, PKK û gerîlayan ra nêbo înan derbê pîlî werdêne. Newroze û Garê de seba şarê ma û têgêrayîşê ma dewrêko newe dîya destpêkerdene. Coka ganî ma Hemleya 'Wextê Azadîye yo' xurtêr bikerê.

Ganî ma xoverdayîşê tarîxî yê gerîlayan ê Garê û şehadetan hol fam bikerê. Ganî ma şehîdanê xo hol fam bikerê. Çunke ê hem seba ma hem zî seba merdimîye erjê pîlî yê. Ma çen nê erjan fam bikerê hende eşkenê armancanê xo bi lezî bîyarê ca.''