Rixmê dês, kuleyanê çimdarîye, kalekol û qereqolanê sînorî zî her roje bi seyan koçberî sînorê Wan û Îranî ra derbaz benê. Hêzê çekdarî yê dewleta tirke û bazirganê merdiman hemkarîye kenê.

Merdimê ke Afganîstan, Iraq, Îran, Sûrîye, welatanê Asyaya Mîyanêne, Rojhelatê Kurdîstanî û Rojhelatê Mîyanênî ra yê, verê xo danê Wan, Îdir, Bazîd û Colemêrgî û tîya ra zî derbazê Tirkîya benê. Bi seyan koçberî zimistanan sînor de mirenê. Êyê ke sînorî derbaz kenê, kewenê destê bazirgananê merdiman û trajedîyê înan wina dest pêkenê.

Wisar de zî reyna Wan û şaristananê bînan de serê sînorî de têgêrayîşê koçberan zêdîyayî. Hukmatê tirkî bi bahaneya koçberan dês viraşt la no dês a raşte seba ke têkilîya mabênê Vakur û Rojhelatê Kurdîstanî bibirno virazîya. 

Hetê bînî ra serê sînorî de na bazirganîya merdiman bi hemkarîya leşkeranê tirkan yena kerdene. Qaçaxçîya merdiman şaristananê Wan, Îdir û Agirî de vurîyaye sektorêkî. Şaristananê Dengizê Reşî, Anatoliaya Mîyanêne Yozgat, Kayserî ûsn. ra bazirganê merdiman yenê Wanî û leşkeranê payeberzan ê qereqolanê sînorî reyde qaçaxçîtîya merdiman kenê.

Kesêko ke nêwaşt nameyê xo bido û mabênê qezaya Çaldiranî û merkezê Wanî de raywanan kirişino ANFyî rê qisey kerd û vat: ''Hema hema her roje merdimî yenê Çaldiranî, ma zanenê ke nê merdimî bazirganê merdiman ê ke Anatoliaya Mîyanêne û Dengizê Reşî ra yenê. Nê merdimî leşkeran de hemkarîye kenê. Înan qeçaxçîtîya merdiman kerda sektorêk. Dewlete zî ney zanena. Seba pereyan bazirganê merdiman û leşkerî hemkarîye kenê.''