Hemsereka Konseya Rayberdişî ya KCKyî Besê Xozat Medya Haber TV de sere de tecrîdê Îmraliyî babetê rojdemî ercnayî. Qiseykerdişê Besê Xozat ra tay noqtayê girîngî wina yê:

''12ê  hezîrana 2019î ra nata yanî pêvînayîşê avûkatan ê peyênî ra nata Rayber Apoyî ra qetî xeberêke zî nêna girewtene. Tewr peyên roniştişanê Neteweyanê Yewbîyayeyan de tecrîdo mutleq bibi rojdem. Dewleta tirke uca de zî nêeşkaye tecrîd îzeh bikera. A raşte Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' resaye astêka girînge coka tecrîd hende bi rojdem û dewlete teng bîya. Êlule de zî kombîyayîşê Komîteya Wezîran a Konseya Ewropa est o. Uca de Buroyê Huqûqî yê Asrinî do 'heqê hêvîye' bîyaro rojdem. Konseya Ewropa hemkarê sûcê tecrîdî yo. CPT û Mehkemeya Heqanê MErdiman a Ewropa zî hemkarê nê sûcî yê. Ganî hinî nê dezgehî nêbê hemkarê sûcê tecrîdî.

Hemleya Azadîye raşt a zî xebat û çalakîyê girîngî kerdî. 69 wayîranê Nobele Erdoganî rê, dewleta tirke rê mektube nuşte. Rayber Apo Îmrali de xo ver dano.Ganî ma zî teber de seba azadîya ey destê ma ra çi bêro bikerê. Azadîya Rayber Apoyî azadîya ma ya.Ganî ma paradîgmaya Rayber Apoyî pêro dinya rê, bi taybetî Rojhelatê Mîyanênî rê vila bikerê.

Ez serrgêra Hemleya 15ê Tebaxe fîraz kena. Ez Fermandar Egîdî bi minet û heskerdişî yad kena. Hemleya 15ê Tebaxe yew têgêrayîşê hişyarbîyayîşî bîye. Bi na hemle Kurdîstan de şorişêkê hişmendîye yo pîl qewimîya, bêhêvîtîye qedîyaye, rêxistinîye xurtêr bîye. Hetê bînî ra Hemleya 15ê Tebaxe verê artêşbîyayîşê cinîyan akerd. Pêro destkewteyê kurdan netîceyê Hemleya 15ê Tebaxe yê.

Gerîlayî ewro hê kokê artêşa diyîne ya tewr pîle ya NATOyî anê la dewleta tirke raştîye nimnena. Artêşa tirke tarûmar bîya. Dewlete bi pêro îmkananê xo hêrişanê bêmabênan kena, her tewirê çeka qedexe û nuklere şuxilnena. La gerîlayî hende aver şîyê ke her gama dewlete bêtesîr kenê. Prosesê verê ma de no têkoşînê gerîlayan tesîranê xo hîna bi zelalî bimojnê.

Gerîlayî bêmabên xo ver danê. Dewleta tirke PDK û Iraqî ra destek gêna. Rixmê ney zî nêeşkena netîce bigêra. Dewleta tirke Başûr de îşxalker a. PDK zî xeta îxanetî rê serkêşîye keno. Ganî şarê Başûrî, dezgeh, rêxistin û partîyê sey YNK, Goran ûsn. na raştîye bivînê ke dewleta tirke nika Başûr de polîtîkaya qirkerdişî ana ca. Dewleta tirke Başûr de dewan vêşnena, xalî kena, şarê sivîlî qetil kena. Bi bahaneya PKKyî dewleta tirke Başûrî îlhaq kena. PDK qalê nînan nêkeno, medyaya PDKyî canêdana nê kerdişan.

PDK ha dewleta tirke de ganê kurdan ser o bazarîye keno. Nê kerdişê dewleta tirke Enfal ê, dewamê Qirkerdişê Helebçe yê. Coka nêrazîbîyayîşê Başûrî qels ê. Ganî vera nê kerdişan qîyamet bêro kerdene. Wa şarê ma tewirê xo bimojne, vengê xo veje.

Iraqî bire daya ke PADÊ, Tevgera Azadî û partîyêka bîne biqefilno. La çira? PADÊ seba êzidîyan têkoşîn kena. Çi zerarê ci Iraqî rê est o? Dewleta Iraqî û PDKyî wextê qirkerdişî de êzidîyî war verdabî. Erdoganî paştî dabî DAÎŞî. Nika zî Iraq partîya êzidîyan qefilnena. Iraqî vat seba ke Tevgera Azadî û PADÊ ma de têkilîye nanê ro do biqefilîyê. Çîyo winayên çin o. Heya beno ke nê partîyan paradîgmaya Rayber Apoyî tesdiq kerda la mabênê ma de têkilîyêka organîke çin a. Eşkera yo na babete de tesîrê dewleta tirke est o. Iraq senî wina her vatişê dewleta tirke qebul keno? Qey îradeyê ci çin o? Ganî şarê Iraqî ney qebul nêkero.

Tehlukeyê vera êzidîyan dewam kenê. PDKyî bi seyan terefgîrê DAÎŞî Behdînan de cakerdê. Ganî êzidîyî kampanê Başûrî de nêmanê û agêrê Şingalî.

Dewleta tirke Vakur de narey hêrişê nuşteyanê kurdkî, govend û deyîranê kurdan kena. La nê hêrişî zî do bênetîce bimanê. Kurdî kurdê verênî nîyê. Şarê ma 50 serrî yo seba nasname, ziwan û kulturê xo têkoşîn keno. Şarê ma do vera nê 'qedexeyê govende û muzîkê kurdkî' her ca de bi ziwanê xo qisey bikero, edebîyatê kurdkî aver bero, bi kurdkî binuso û deyîranê xo vajo. 

Dewlete hêrişê xozaya ma kena û wazena cografyaya ma talan bikera. Mîsal dewlete wazena Dêrsim de Munzur de HESan, awbendan ûsn. viraza. Munzur yeno manaya Dêrsimî. Eke Munzur çin bo, Dêrsim zî do çin bo. Şarê ma yê Dêrsimî wa qîyamet bikero la destûr nêdo hêrişanê kulturel û ekolojîkan!

Birê îdamî yê vera Pexşane Ezîzî û Şerîfe Muhammedî nêzdîbîyayîşê Îranî yê vera cinîyan ê kurdan eşkera kenê. Dewleta Îranî hema zî vana qey bi îdam, teda, tepiştiş û îşkenceyî do bieşka waştişanê cinîyan asteng bikera. Îran do bi nînan netîce nêgêro. Wa rejîmê Îranî waştişanê azadîye û demokrasîyî bivîno. Nêbo do çin bibo.''